USA gamsung Boston Khuapi, Andover Newton Theological School (ANTS) ah D.Min Candidate, Pastor Pau Do Lian (Valvum) tawh holimna tomno hong khahsawn ing.
Tomlakna : Ciin Sian Khai = CSK; Pau Do Lian = PDL
CSK: Na min, Pianna khua nong gen thei ding hiam?
PDL: Ka min Pau Do Lian hi. Tedim gam Valvum khua pan hi ing.
CSK: Pasian thu nasinna sangte nong gen thei ding hiam?
PDL: B.Th. (Nazareth Bible College, Lamka), B.D (Bharat Bible College, India), M.Div. (Acts Bible College, Yangon), D.Min Candidate, ANTS ah (2011 – 2014?)
CSK: Andover Newton Theological School (ANTS), Boston ah, na sangkahnopna thu nong gen thei diam?
PDL: Yangon a om, Acts Bible College leh Victory Bible Institute ah Lecturer 2001-2008 sung kasep laitak in Myanmar Church History hilh theihna ding hunpha ka ngah hi. Tua pan in Kawlgam sung Missionary hong pai masate thu zong sinto kawm, hilhto kawm in ka omna sungpan Adoniram Judson thu limtak in ka simciangin, ama sangkahna munah sangkahnopna lungsim hong suak hi. Judson gualzawhna thusim pawl khat zong kasin kha hi. Kawlgam ah hong kipiak khiatna thu kasim ciangin, hi bang gualzawhna a ngah theihna sangin (school), sang hoih hi ding hi ci in, ka ngaihsun a, tua hangin, ANTS sangah kapnopna hong suak ahi hi. Tua a kipan in, Paisan tungah thungetna tawh kiap in, Pasian tungah kiapna leh hanciamna ka neihzawh nungin September 2011 a kipan in sangkah theihna hunpha Pasian in hongpia hi.
CSK: ANTS, Boston ah nasin khak thute leh hampha na kisak thute nong genthei ding hiam?
PDL: USA gamsungah ANTS sangpen Lai Siantho sinna Seminary masa penpen ahih ziak in, Lai honghilh siate, well-known scholar vive ahi uh hi. Bek thamlohin Leitung ah University minthan penpen a kigen Harvard ah Elective course te laktheihna ding hamphana ka ngah manin, angtang kisa in hampha ka kisa hi. Bektham lo in, Adoniram Judson Kawlgam a apai zawh kum 200 cinna phawkna, Boston ah Feb, 2012 sungin a kibawlna ah kihel khabek hilo in, Panel Discussion ah presentation pia kha ka hihman in hampha kisa ing. Tua banah hong tungding July 14, 2013 ni in Adoniram Judson Kawlgam a tunzawh kum 200 cin phawkna ah zong ki helthei ding leh organizer te lak ah khat in ka kihel khak manin hampha kisa sawnsawn ing.Tedim gam Valvum khua pan in USA gam Harvard sangpiah pilna kasin theihna ka ngaihsut ciang in, thu dang hilo in, Pasian hang bekbek ahihna ka phawk a, Topa tungah lungdam kohding leiban tampi ka neihlam ka kiphawk den hi.
CSK: Mailam ah Pasian nasepna ding mun geelkholhna na nei hiam?
PDL: Pasian deihna mun ah kasep khakding, ka nisim thungetna leh kiapna hi den tawntung hi.
CSK : Hunpha nongpiak man in lungdam mahmah ing.
PDL: Kei zong lungdam mahmah ing.
Topa Thupha!
CSKhai Jeffrey Pau Do Lian)Boston(tawmmvei)
Boston (Tawmvei)
0 Tongkum :
Post a Comment