ZAM Thupuak :: 29 December 2013

Sang ki-ap thei :: 2014 kum a kipan ZEC sang Kota Damansara in bawda song kinei ta ding hi. 17 Dec. 2013 (Thur) ni-in UNHCR sang lam makai officer khat in hong en khin zo a, bawda om te a ding van kisam lei na ding RM 2180 tawh hong huh pah uhi. NGO kipawlna nih in zong a kisapna mun mun ah panpih ding kamciam hong pia zo uhi.

Sia/siamah dingte :: Sia Mungpi (Head Teacher)Siamah Man Khawl (Zomi) Ms. Tru D. (England)
Siamah Ju.C (Kachin) Siamah Mary (Zomi)
Siamah Ngaih Lun (Zomi) Ms. Jae Park (Korea)
Siamah Yon Yon (Shan-Chinese) Volunteer Local Chinese siamah 3 om zo hi. Co-ordinator: Sia Khup

Sang lutman RM30 Tuition kha sim: RM40
Basic Computer course: Microsoft Word, Excel le PowerPoint subject khat in amawkna in ki sin sak ding hi 
Bawda omte kha sim RM 150 (tuition + Annek + Bawda)
Bawda song om ding mi 19 pha zo hi.
Bawda song om dingte kum 6 pan a tung siah kisang hi.
Nitak sim nai 2 sung lai sinna hun siamah nihta in cingin makaih ding a giah pih den ding hi.
Lai hatlo zaw diakte a tuam in tuition ki neihpih ding hi.
Amau kum zui in Pasian thu tawh pattah in lamlahna zong ki nei ding hi.
Bawda song om nuamte’ a ding a nunung pen December 31 ni ciang kisang ding hi.

Hong hawh nuamte a ding address:
Bawda (Hostel) : No. 5-1, Jln PJU 5/20B
The Strand, 47810 Kota Damansara
Sang kahna (Class) : No. 2-3 & M, Jln PJU 5/20C
The Strand, 47810 Kota Damansara

Kizop na ding Siamah Man Khawl: 017-3574 379,
Sia Mungpi: 011-16391226

2013 ZSM kumcin khawmpi
2013 kum ZSM/Genvai nasepna khempeuh gualzawhna, ZSM 2013 kumcin Khawmpi leh 2014 ZSM palai ding kiteel na hun pen 27.12.2013 ni in ZAM Hall ah 12:00-04:00PM dong kinei thei a, Khua kipawlna tuamtuam pan khua makai te leh Pawlpi tuamtuam panin Siate, makai te leh thudot pi te tampi hong kihel thei uhhi.

Hunpi nih in kikhen a, Sia Hau Khai ZAM lutangpi in hun masa hong makaih hi, hun kipat nangin Rev. Nang Lian Khual hun ap thunget aman ciangin Pa Kam Lian Mung ZSM lutangpi hong dingto a, thu konghon na aneih khitteh 2013kum sung Malaysia gamsung pan hong nusia Zomi mimal(28) te phawkna leh zahtak piakna kinei masa a, mipi dingin daikhipkhep in lukun ngilhngelh kawmsa in phawkna hun khat kinei masa hi. 2013kum ZSM nasep nate, Sia Khoi Sian Tuang ZSM thuvan pi in abanban in pulakna hong neihkhit ciangin sumlut leh sumzatna khempeuh Pa Steven Zam Cin Dal ZSM sumkempi in zaksak na kician takin hong nei leuleu hi.

Hun nihna sungah palai thak dingte kiteel na leh ki-ap na hun te pen, Dr. Cin Sian Pau leh alawmte thudotpi tengin hong makaih aa lungkim huai takin 2014 kum ZSM palai ding kiteelna aman khitciangin mipi thungetsak na leh Rev. Dr. Cin Sian Pau thupha piakna tawh hun khempeuh kiman sianghi.

2014 kum ZSM palai sem ding te
1. Kam Lian Mung (Lutangpi) Tungzang
2. Zam Cin Dal (Lutangpi huh) Tuikhiang
3. Khoi Sian Tuang (Thuvanpi) Thalmual
4. Thaa Mung (Thuvanpi huh) Haupi
5. Tuan Sawm Tuang (Sumkempi) Cikha
6. Thang Phian Mung (Sumsazian len) Thangnuai
2014 ZSM lutna sum kipia theita

2014kum Genvai kipawlna (ZSM) lutna sum pen ZSM/ZAM zum, Khua makai te leh Pawlpi te ah kipia theita hi. Beisa kum a bangmah in mi(1), kum (1) RM10.00 hi ding aa, kumkhat ai nasum khiatin January 1- Dec 31 ni ciang huam ding hi. Khua kipawl na makai te leh Pawlpi makai te in laibu na ngah naikei uh leh ZSM/ ZAM zumah kila theita hi.

Zomi Cup lutman ki piatheita
Zomi Cup 2014 aki helding Team 40 val lakah lutman leh Deposit piasa teng:
Anlangh Teeklui Voklaak Mualbeem
Singunau Thalmual Sezang Laaitui
Ngennung Dalkhai Suangsang Limkhai
Leidawh Buanli Mualpi Tungzang

Apia nailo te’n 31 December 2013 ni ngak sese lo in lutman, Deposit, min leh ZAM Card Number te hong ap mengmeng le uhcin cih kong zasak uhhi. Dotnop aomleh:

Kumthak zum ki khakding :: January 01, 2014 nipen ZAM zum ki khakding hi.

Lungdam Kohna

• Zomi Catholic (ZCCM, St. Joseph Church, Sentul) pan tukal Thupuak bawlnading RM50 hongpiakhia uhhi.
• ZEC Kota Damansara sanginn panin Thupuak bawlnading RM50 hongpiakhia uhhi.
• Tuithang khua Tg. Cin Tung Nung (Laizom—Nungpii) leh Tg. Suan Lian Mung te unau in Thupuak bawlnading in RM100 hongpiakhia uhhi.

Zomi Education Center (Talalla & Maharajalela) kumkhat sung nasepna
ZEC Talalla & Maharajalela ih kum khatsung (2013) nasepna a nuai a bangin a tomin hong pulaak ing.

School Location :: ZEC Talalla & Maharajalela sang pen 2007 kum in Zomi sang naupang 35 tawh 65A, Jalan Talalla, Kuala Lumpur pan in a kipan khia hi a, tu kum 2013 laisin kum bei dong kum khat khit kum khat ong makaih ih biak Pasian min phat masa ing. Tu-in ahih leh sang kahna mun nih kizanga, Kindergarten pan Grade 2 ciang ZEC-Talalla ah, Grade 3 pan Grade 5 ciang ZEC-Maharajalela (155A, 1st Floor, Jalan Maharajalela, Kuala Lumpur) ah cih bang in sang kikahsak hi.

Students :: 2013 sang kah kum a dingin min lakna January 7-11 sung kinei hi. Tukum sung sang naupang vekpi 127 min sanna kinei sung pan Pasian hehpihna tawh sang naupang 16 in gam thumna zuat theihna hamphatna ong ngah thei uh hi. 2013 April kha sungin lamet hetloh kawmkal ah sang naupangte a dawn a kha i “Van” ong tuahsiatna hangin sang naupang 1/3 in sang ong zom thei nawnlo hi mah ta leh tua bang haksat mangbatna kawmkal ah Pasian in tuahsiatna sung pan a hoih pen ding lam hong honsakin, hostel kibehlapin hostel sang naupang 57 leh inn pan ki leh a hong kah vekpi gawm 70 val tawh kum bei dong sang maban ki zomto thei hi.

Teachers :: 2013 sangkah kum sungin ZEC-T&M ah Zomi naupangte lai hong hilhsak a ong pattahsak Zomi sia/siama 14 (sia/siama 4 tukum sungin gamthumna tung), UNHCR pan 4 leh gammi (Local) sia 20 kim bangin Zomi naupangte pattahna ah ma kipang khawm thei hi. Hi bangin tha man kicing in kipia zolo himah ta leh itna leh deihsakna tawh kipiakhia a lai ong hilhsak Zomi sia/siamate, mipih sapih hita keh Pasian itna leh deihsakna tawh kipiakhia a lai onghilhsak UNHCR pan a sia/siamate leh Local sia/siamate tung ih biak Pasian in thupha a henhen a tahtah in hong thukkiksak ta hen. Amen.

Subjects :: ZECT&M sangah sang lai subject pi 4 ahi English, Mathematics, Science leh Zolai cihte hoih takin a kihilh banah kum khat sungin laivuanna thum vei kinei hi. Tua banah Art (khut siamna tuamtuam), Zo ngeina, Zolaam cihte kihilh beh bek tham lo-in Pasian kammal Lai Siangtho tawh kimakaih in kipan tah hi.

Spiritual :: Zingsang sim laisin kipat ma-in sia/siamate ma kaihna tawh LST tungtawn in naupangte thapiakna hun khat ki neihpih den hi. Hostel a omte kal khat in nitak biakpiakna nih vei kineihpih a Zopau tawh khat vei Mang pau tawh khat vei cih bangin kipantah hi. Hostel om khempeuh Lai Siangtho loh gen kidemna khat vei kineihpih a thangah huai mahmah hi. Nipi ni simin Kuala Lumpur International Friends Fellowship ah biakpiakna kinei a naupang neute ahih leh Ruth Education Center a sang naupangte in Suday School hong hilhsak uh hi.

Activities :: Cidamna ding leh muhna ngaihsutna khantoh theihna dingin kimawlna tuamtuam (sports) leh a pua lam mun thupi tuamtuam ah paipihin activity tuamtuam kineihpih zel hi. Hi bang sport tuamtuam leh activity tuamtuam te in naupangte lungsim suaktasak bek thamlo in muhna leh theihna khangsak a lai deihna leh pilna zonnopna khangsak hi. Sports leh activities kihelkhakna pawlkhat a nuai a bangin hong pulak ing.

• January 10 in Lehigh University pan university sangnaupang 20 sang hong hawhin sangnaupang te tawh ni khatbup hun zangkhawm uh a hamphatna tampi ngah lawh uh hi.
• January 19 ni in Pastor Micheal Moey deihsakna leh vaihawmsakna tawh sangnaupang 60 leh siate in Sunway Lagoon paitheihna hamphatna ngah uh a, nuam kisa thei mah2 in tuni dong mah gelbelin nei lai uh hi.
• February leh March kha huamsungin mangkangte makaihna sang khat ahi Garden International School (GIS) ah sangnaupang 80 in ni 10 sung mangkangte ngiat ih makaihna tawh subjects tuamtuam sinna kinei thei a phattuamna tampi ngah lawh uh hi.
• February 20 ni Zomi Nam Ni in Zo ngeina laam tuamtuam tawh Zomi Namni pahtawina kinei thei hi.
• March 3 mi in Methodist College, Kuala Lumpur a kibawl Carnival Game ah Pastor Micheal deihsakna mah tawh sangnaupang 80 hong sam uh a hih manin va kihelin naupangte lungsim suakta sak mahmah bek tham loin muhna tampi khangsak hi.
• June 8,15 leh August 17 ni thum sung Faisal Cup ah ZEC-T&M panin U10, 12, 16 football (pasal) leh U14 netball (numei) a kigawm team 4 kihel thei in U10 football (pasal) in a thumna leh U14 netball (numei)te in a thumna cih bang minam dangte leh sang dangte lakah Zomi min kitawisang thei hi.
• June 10 ni World Refugee Day (Leitungbup Galtaite Ni) ah ZEC sangnaupangte in Zolaam hoih mahmah khat tawh minam dangte mai ah ZOMI hihna kipulakkhia thei hi.
• July kha sungin Malaysia TV3 te sang ong hawhin sang vai tuamtuam interview na ong nei bektham lo-in ZEC thu gambup theih leh muh theih dingin TV3 August 1 nitak 5pm pan 5:30 live ah ong khah khia uh hi.
• August 8 ni in Francis Khampi deihsakna tawh sangnaupang 50 in Carnival Game khat ah va kihel kha in nuam kisa mahmah hi.
• October 12 ni in MCKL Carnival Game ah sangnaupang 40 in kihel theihna hamphatna ngah uh hi.
• October 9 ni in UNHCR makaihna tawh Talent Show kidemna ah sangnaupang 4 in la kidemna ah va kihel thei a, tua sungpan khat Semi Final ciang hong tung thei a, hi bang kihelna in experience tampi ngahsak hi.
• November 9 ni in SIBKL-BLESS pan in Christmas Party ih sangah hong bawlpih in nitak an lim mahmah hong vak bek thamlo in naupangte letsong tampi hong piaksak uh hi.
• November 16 ni in Tzu Chi Foundation pan in pattawi taakcing naupangte pahtawina pawi lianpi khat hong bawlpih uh ahih manin naupangte lungsim tampi lawpsak tuam mahmah hi.
• November 30 ni in ZEC sang 10 om lak panin sang 9 ki helin a khat veina ZEC Graduation nop citakin kibawl a pahtawi taak sang naupangte leh sia/siamate khempeuh pahtawina hun nopcitakin kibawl a tha kingah mahmah in nuam kisa mahmah hi. Tuan ih mah in SIBKL vaihawm siamna tawh kibawl “Great Sport Day” ah sang naupang 20 va kiheltheih ban ah ding letsong honpi khat tawh sang ong tung kik uh hi.
• December 7 ni ciangin GIS sangah SIBKL te vai hawmsakna tawh sang 10 kiim in Christmas party kizang khawm a tua ni in sangnaupang buppi kipai in Zomi sang naupang te in Ngeina lam khat tawh mapangna kinei thei bek thamlo in sang naupang khempeuh letsong hong piaksak lai uh hi.
• December 22 ni leuleu ciangin KLIFF Christmas pawiah ong sapna uh tawh kizui in Sia a hi thei zahzah leh sangnaupang 15 kim va kihel in naupang te in Christmas laam khat leh Zo ngeina laam khat tawh et lawm takin ong laam uh a tha kingah mahmah hi. A pai khempeuh sunan ong vak banah letsong khattek tawh lungdamtakin inn ong zuansak hi.
• Hih a tunga teng banah Local sia/siamate in a mau hilhkhakna class ciat mun thupi tuamtuam ah class pinic paipih ciat uh hi.

2014 Academic Year :: Maikum 2014 sang kah kum a dingin minsanna Dec.17-19 sung kinei a, Boarder om ding naupang 70 leh inn pan ong ki leh a kah ding 20 kim min sanna kinei khin hi. 2014 laisim kum ah English, Mathematics, Science, Zolai leh Art subjects te banah a nuaia bangin geelna nam 7 kineih beh hi.

1. Nitaksim laisim hun nai 1 kineih pih ding. (Hostel omte)
2. Pasian thu tawh a hithei zahah in kimakaih ding. (Morning & night devotion)
3. A hunhun in talent (siamna tuamtuam) kidemna neihpih ding. (LST lotngah, La, tangthu, limsuaih, kimawlna tuam2 etc…)
4. Computer Basic sinsak ding.
5. Music hun. (Solfa, Staff note, Guitar, Drum, La, Laam, etc….)
6. Pahtawina tuamtuam nei ding. (Lai lam, gamtathoih, etc….)
7. A pualam activity tuamtuam han ciampih ding.

Contact Persons:
Sia Tuang : 016-913 7121
Sia Francis Lamthang : 014-225 9458

Address:

155A Jalan Maharalela,
50150 Kuala Lumpur
Office Tel: 03-2142 6659
Hotline: 016-293 9027
Email:  zomiassociationmls@gmail.com

Malaysia gamsung aom ZAM (Zomi Association of Malaysia) panin Zolai tawh kalsim in Newsletter neiden uhhi. Kuala Lumpur khuapi sung aom Zomi te kikhopna Biakinn Churches tuamtuam leh Zomi te paidiakna ansai Restaurants tuamtuam ah Printed Copy kikoih kawikawi hi. Ahi zongin Kuala Lumpur khuapi tawh aki gamla aom khuate ah ahunlap in ki ngahlo ahih manin, tuate ading khualna leh Internet azang leitung muntuamtuam gamtuamtuam aom Zomi te ading khualna tawh ZomiDaily website tungpan kongsuaksak zelzel uhhi.