Kawlgam Passport Kum 5 Term ah Kikhanto Ta
Kawlgam pan gamdang pai theina laibu (passport) pen abeisa ciangciang kum 3 sung bek nungta (kizanghthei) a, tukha November 1,2012 ni akipan kum 5 sung kizanghthei (nungta) dingin kibawlta ding cih thu Kawlgam passport zumpi (yangon)ah thunei Police Officer Major U Soe Tun Aung in genkhia cih kiza hi. Nidang in Tembaw nasem (Sailor) te bek kum 5 kipia a, tu akipan a siau khempeuh kipia dinga, a bawl man sumbeite zong kikhangsak tuan lo ding ci hi.
Passport bawl zia tawh kisai-in sailor,show job,economic, student,religious,social visit le dependent cih bangin nam 7 in kikhen ta dinga, deidan nei loin a siau khempeu in suakta tak kingah thei ding hi. Tua bek tham loin ahunbei ciang bawlkikna ( Renew) zongah sum bei kibang lel dinga, abeisa hun mah bangin kibawlthei ziau ding ci hi. Hih pen gammite ading phattuamna tampi om ding cih ngaihsutsakna ahi hi cih thu Major U Soe Tun Aung in gen beh hi.
Passport bawlna ah tangmi (Agent) kisam loin, mimal kimin olno tak abawl theihna dingin akisam lai thupite akipan sum le paii bei dingte zong mipite' theih dingin kibawl khin ta ci hi. Tua banah nidang hun a kisam zel ahi Pongsan (Form 17) le (Form 19) cihte zong kisam nawn lo dingin kibawlthei ta cih thu kiza hi.
Tukum January 2012 akipan pan July kha ciang kha 7 sungin Kawlgam passport zumpi panin passport 120,000 val kibawlsak khin cih thu zong Major U Soe Tun Aung in gen beh hi. Hih bangin Passport kum 5 sung zattheih/ keptheihna om manin, gamdang zin pakpak nuam gammite ading tampi phattuamna le mavaanna om zaw tham ding hi ci-in Tongsan Media Group in lametna kinei hi.
0 Tongkum :
Post a Comment