Topa'n ka thungetna hongdawng in Tapa khat hongpia

Mihing ihhih na tawh ki zui-in zilehta nei in a pung, akhang thei te  ih hihi. Zinei, pasal ki nei to in ta kinei to tek hi. Zi leh Pasal ih neih khit ciang taneih ding masuan a nei te ih hihi. Zinei in tanei ding lakah kei(Vungh Deih Tung) zong khat ka hihi. Zi ka neih khit tak in ta neih pah ding hoih ka sa tuan kei a, nuntak haksat tawh tawlkhatsung nau nei nai lo in ka om phot uh hi. Ka ngaih sut sut teh sumleh paai tawh a ki leizo lo, ei mihing te han ciam na tawh a piang zo lo thu khat pen Topa mah ap in a ma deih na bang in hi hen cih na tawh Topa tung ah ka ap hi. Ta neih ding ka lung gulh mah mah a Topa tung ah thu ka ngen hi. Azen zen in zinei na pi ta nei lo bang hi leng pen ih lung sim khat ah a ki lung leng mah mah ding dan hi a, suan leh khaak  abei ih hi ding hi. Tua a hih man in zika neih khit hang ta ka neih theih loh khak ding ka lung sim sung ah ka dah giau guau hi. Laisiangtho sung ih sim teh ngen un na nget uh leh na ngah ding uh hi cih pen ih sim kha zelzel a, a thei lo ih om kei hi. Tua a hih man in ke’n zong ngen leng ki ngah pel mawh ding hi cih ka thei a, Topa tung ah Tapa tam pi  hong pia in ci in thu ka ngen hi.  Thu ka nget na ah bang hang in tapa ngen in deih se se ka hiam cih leh ka cimang ding ka dah man a hihi. Tulai tak hih lai a sim mimal khem peuh zong a cimang khak ding a dah lo om in ka um kei hi.

26 December 2012 ni in ka zi Saannu(Niangh Saan Dim) in nau paai ta hiam? paai nai lo hiam? cih a ki theih nading in ka innveng vua Clinik khat  ah ka ki lak uh a, ka kisit sak uh hi. Siavuan te in Saannu check uh a, nau paai ta hi hong ci uh a hih man in nakpi tak in kalung uh a dam hi. Topa’n ka thungetna hong dawng taktak ta  ahih lam ka phawk ciang Topa tung ah lung dam ko lo in ka om thei kei hi.

2013 kum kipat a ki pat pen tukum sung a ding in deih na bul pi  Top 5 Topa tung ah ka ngen hi. Khat na ah Topa aw tu kum sung a ding in Tapa khat hong pia in ci in thu ka ngen hi. Ta nei veve pen Tapa mah hi leh ka deih deuh sese hi. A zenzen in tanu hi leh zong bel a poi na om tuan lo na pi Tapa hi leh ka deih na  alian hi. Banghang hiam cih leh Numei te pen pasal a neih khit uh teh a pasal lam zui pah a,Pasal te a hih leh zilehta nei leh suan leh khaak pung ki ci in beh leh phung,minam a ding in a ki beh lap ki suak hi. Tanu te thupi kei a ci nuam kahi kei a, Tapa a thu pit na leh tapa ka deih na a gen nuam ka hihi. Topa aw…tulai tak a, ka zi in nau a paai pen ta pasal hi sak in ci in  tam vei pi tak thu ka ngen hi. Kazi  in nau a paai cil pan ki pan in tapa khat neih ding pen ka thunget bul pi khat na a hihi. Nau a paai zawh kha 4  hong val toh teh ka nau uh scan sak ding in 13 March 2013 ni in Jinjang ah ka va pai uh hi. Nitak lam nai nih in ka va tunguh a, mi na tam khin mahmah hi. Ka mai vuah nupi a gaikeikai khat ki sam a, tua nu hong pai khiat khit teh nanau pen numei maw? Pasal ci in ka na dotleh kitel nai kei hong ci hi.(Nau paai te in kumpi zato ah ih scan sak ciang numei a hih leh siavuan te in hong gen nuam lo uh hi) Khabang zah pha ta a hia? Ka cih leh kha 7 val ta hong ci hi. Kha 7 val ta in kitel nai lo maw…Ka laih!!!!  Ko a kha 4 val hi pan ci leng kitel nai loding ai ve maw ci kawm kawm sa in  hong ki sap ding ka ngak uh hi. A sawt lo in hong ki sam a,siavuan nu in nang a pasal na hiam? hong ci-in hi mah ing ka cih leh hiah hong lut in la, nang zong en in!hong ci a, ka nau uh hong en sak hi. Siavuan nu  in a lu, akhe cih dan in teh teh a,a hi zong in ke’n ka muh hang bang hiam ka thei kei hi. Siavuan nu in na nau uh Pasal a hi hong ci a, khat vei ka dong pha kik hi. Siavuan nu in “ anak lelaki” hong ci kik hi. Saannu in bang gen hiam hong ci a, na nau uh pasal a hi hong ci a hi...ka cih leh Saannu zong nuam mahmah a ka nupa unki en in kanui khawm keei uh hi. Tua lai tak in Topa aw…lungdam lua ing. Kong thu nget na nong dawng pen lung dam lua ing ci in Topa min ka phat hi.Siavuan nu in na nau uh a gikna 413.16g+0.3SD gik ta hi hong ci hi.

29 May 2013 ni in Jinjang ah ka nau uh a ka va scan sak kik uh hi. Ka nau uh a gikna 1779g+0.5SD gik ta hi hong ci uh hi. Na nau uh pasal a hi mah hong ci kik uh hi.

24 July 2013 ni in MCH ah ka va pai uh a, Nitak lam teh Jinjang  ah nau ka va scan sak leuleu uh hi. Ka nau uh a gik na 3276g+0.2SD gik ta hi hong ci hi. 26 July ni  in nau in hong tun nai kei zong in zato na pai lim lim ta un ci in hong vai khak uh hi.

Nau  apaai sung in kadah mah mah thu tam pi te lak ah khat na in Taxi a hihi. Nih na ah nau suak haksa lo in nau suak zawh na ding a hihi. Thum na ah sum leh paai ki hau lo a hih man in sum tam a bei loh na ding ka lung gulh bul pi hi a, thu ka ngen den hi. Tua bek hilo nau a ci dam in khutleh khe kiim, thacing, mel hoih, …paubaang na ding om loh nading zong thunget cipi in ka ngen den hi. Nausuak ding in ka zi a gil hong na mah mah leh bang cih mawk ding ka hiam cih na tawh kisai in ka ngaih sutkhak teh ih mut ka nat lawh det thu khat a hihi. Midang tedan in lah Mawtaw a nei lah hi lo, Taxi te tawh zong ki contact gawp na a om lah ki hilo a hih man  in nak pi in ka dah khol a, Topa tung ah ka ap hi. Nausuak haksa a, a nu te a hu bei lawh mi tam pi tak ka thei ngei a, a nu nausuah haksa lua in, banglo khat a cih ding ka dah khol lua hi. Topa aw nang hong theih pih ta in ci in thu ka ngen den hi. Sumleh paai ki nei lo a hih man in ka lungkham khol mahmah a, Topa tung ah ka vai teng ka ap hi.

25 July 2013

07:30 am in ka khang lo a, Saannu na tho khin in, a lu nasawp khin hi. Hair dryer tawh a sam na mut keu sak a, tua ging in kei hong phawng  a na hihi. Tho baih na cia ci in ka dot leh ka kawngna pian gun in nuam kei hong ci hi. Ke’n zong kawngna a hih leh nau suak nuam hi ding hi ci in ka ki sil sam sam a, ki thawi in Hospital Selayang ka pai sawm uh a, ka inn pan un ka pai khia uh hi.

08:10 am in Tesco ah Taxi om thei a hih teh cih na tawh Tesco lam ka zuan phei pong uhhi. Azenzen in Saannu in  a gilnasa lua bang hi leh pen lam pai zo nawn lo ding a,a buai mahmah pah ding ka hihi. Saannu lam pai zo lai a hih man in Taxi zong kawm ni ci in Tesco ka pai phei uh leh upmawh loh pi inTaxi (HWD 3602)khat tawh ka ki tuak pah uh a, Hospital Selayang ka cih leh “Saya tak benar lah” hong cih san hi. A hi zong in Saannu gil a muh teh “Mari lah naih naih” hong ci in hong tuang sak hi.(Ka om na inn pan un Tesco pen khe tawh minute 3khawng ki pai hi.) Topa hoih na hih mun ah ka mu hi. Mawtaw lah neilo ka hih manin nau suah kuan ciang zato pai na ding ka lung kham det thu khat a hihi. Thu ka nget ciang in Topa aw nau suah hun ding pen sun sung, Taxi a om hun sung hong hisak in la, kei a ding in haksat na om lo ding inhong vai hawm sak in ci in thu ka ngen zelzel hi. Tesco pan in Taxi ka sap zelzel ngei a, nai khat sung ih ngak zong in Taxi hong hong pai lo thei lai hi. Tu in a hih leh a hun lah zingsang nai 8, Kumpi nasem te mawtaw tamhun, Taxi ka zon kul lo in Taxi khat tawh hong ki tuak sak …Hih bang a hong vai hawm pih pen Topa lo ngal a dang om lo hi. Ka thu nget nget nate Topa’n hong dawng tak pi hi cih ka ki thei hi. Midang te in hong theih pih kei zong in kalung sim ah Topa hoih na hang bek hi ci in telcih tak inka tel veva hi.

08:30 am in Hospital Selayang –Kepong, 68100 Batu Cave, Selangor Darul Ehsan,Tel:60361203233 ah Dewan Bersalin a cih na ah ka tung uh a, Register na ding sum Rm 30 hong ngen pah hi. Siavuan te in a bang na a hihiam? Hong ci uh a, akawng na sa lua hi ka ci hi.Saannu pen a sunglam ah sam suak pah uh a, Siavuan te in checking bawl uh hi.

09:15 am in Siavuan pa hong pai khia a, na zi tawh ki sai tawm khat dot nop hong nei ing ci in discussion minute 5 sung khawng hong bawl pih a, dot ding a ki lawm, theih ding a ki lawm tam pi hong gen hi. Tua hong gen laitak in Saannu checking a ki bawl na khaan sung pan in hong pusuak khia hi.

12:00pm ciang in damlo a zato lum te a ding an hong tung a, Saannu in zong anngah a hih man in an va ne hi.

01:15pm in Saannu kisam kik leuleu a, checking leu leu uh hi. Minute 15 sung khawng khit teh Saannu hong pusuak kik hi.

03:00 pm pawl in Saannu in  a kawng na sa lua a, Saivuan te kiang ah hong gen sak in ci a hih man in siavuan te kiang ah ka zi in  akawng na sa lua hi. Heh pih na tawh hong et sak kik un ka cih leh Ok wait.. hong cih san in tua bang teng tawh nitak nai 4 hong sat kuan hi ta hi.

04:00 pm in Counter a tu te in ka min hongsam uh a, deposit ding Rm 800 hong pia in hong ci in hong ngen uh a, sum ka pia hi. Sum ka piak khit uh teh Nurse khat in hong zui un ci a hih man in ka zui uh a, Wad 5C, BED 26 ah hong kha hi. Nitak nai 7 val om kei in hong ci thuah pah lai hi. Saannu in lah a kawng na sasemsem a hih man in ka lung a nuam kei lua a, a kawng ka mek sak kawm kawm hi.

05:10pm teh Siavuan khat  hong pai in hong check a, na zi naubu cm bang zah ki hong hiam ci in hong dong hi.Ken zong sorry ei thei keng ka cih leh nevermind hong ci in a mah ngiat in hong check sak a, na zi pen a naubu 4cm ki hong ta hi hong ci hi. 10cm a ki hong nakleh nausuak thei ta ding hi hong ci hi.

06:00pm ciang dong pen Saannu in a kawng na sa lua in ki pei pei a, bang bang hi leh ka ciah ma in a moh nek ding va lei ning ci in moh leh tui Saannu a ding in ka valei sak hi. Saannu pen a kawng na sa lua in ki pei pei a, ka cih nading ka thei tuan kei hi.

07:00pm tak ciang in Security numei khat in nahun cing ta hi, zingciang sun 12 in hong pai kik ing hong ci a, Saannu a kawngna a sa lua a, ki peipei pi mah, ut lo pi pi in ka pai khiat san hi. Ka lung nuam vet lo in ka lung ngai ngai hi. Siavuan te in lungpa tau kei in a hoih loh na khat a om leh phone hong set nung ci uh a hih man in ka om na lam uh zuan in ka ciah hi.

08:00 pm in ka om na innveng mun khat ka tung a, an ne in ka tawl dam hi. Tua khit teh inn ciah suak in  ka ki sil a, ka Computer ka hong hi. Ka facebook pan in zato pai ta ung ci in ka lawm teng ka za sak hi.Saannu aw bang na ci hiam na gim lua hiam a na lua hiam ci in SMS ka khak a,a hi zong in bang mah hong ki thuk lo hi.

09:00 pm tak teh Saannu in ka phone hongsam a, ka let leh Nalua na lua nalua…U Tung ka kiang ah hong pai aw…gim lua ing…ka cih na ding thei nawn keng…hong ci a ka lung sim ah bang mah hong om nawn lo hi. Saannu tawh a ki ho ho lai Saannu in nurse te khat a phone na pia a, nurse nu in na zi nau suak ding hi ta hi, a man lang thei pen pen in Zato ah hong pai in hong ci uh hi. Ka computer a power pan off ziau in ka puan ka laih sam sam  a, ka inntek pa uh phone ka sam hi. Heh pih na tawh Selayang zato  ah hong kha in ka ci hi. Ka inntekpa pen mun dang khat na pai a, sorry ngel ei, kei ka om na gamla peuh mah hi ven, Taxi na zong zaw ve hong ci lai lai hi. Keizong ka innnuai vuah tuak suk sam sam in ka khuadak leh India te khat in  a mawtaw a sil khat ka mu hi. Tua pa kiang ah Zato ah hong kha in ka cih leh aw ci in hong kha pah bil bel hi. Nidang a Taxi ding ka lungkham kham lai a, Topa tung ah ka ap pen a hun lap leh a kitang sam bang in hong pan pih ka Topa a hihi. Hih india pa pen nidang in tua mun ah cik mah hun in a mawtaw sil ngei lo hi. Taxi zong hi lo a, a ki saap thei zong a hi kei hi. A hi zong in Topa tung ah ka vai teng ka apsa a hih man in Topa in hong vai hawm sak a hih lam tel cih tak in ka tel hi. (Nau kasuah khit uh ciang ka khuanung ngaih sut kik leh ka innkong pen khak ka hiam khak lo ka hiam cih pen ka tel kei liang hi. Ki nawh thawi lua in ka lung sim ah Saannu a gim lam thei ka hih man in ka hi biangbuang gawp hi)

09:30 pm in Dewan Bersalin a cih na ka va tung a, Counter te kiang ah ka zi tulai tak a sung ah om hiam ka cih leh ngawng awh  nambat 5 hong pia a, Room 5 ah ka tai phei pah hi. Siavuan te, Nurse te na om ngei ngai uh a, ka lut thei dia ka cih leh lut in hong ci uh hi. Saannu pen a kawngna sa lua in naki kokeei a, kei zong ka cih na ding ka theikei hi. A hi zong in kei ka tun teh nak pi tak in nuam tuam ding in ka um mawh hi. Nau suak khaan a hih man in a kisin sangnau pang mi 10 bang zong na om uh hi. Saannu in nasalua in ki peipei a, a khut ah len in lau ken aw….Saaannu, ih nau hong suak nuam lua ta a, hong tunhi. Denciang ih nau na tawi ding a, nawi a pia kaukau ding na hi veh ci in tha ka pia hi. Ka lung sim ah ka nau uh lah kg 3.35 a hih man in asuak zo kei mai tam maw ci in kadah mah mahhi. Siavuan khat leh Nurse 2 leh aki sin sangnau pau 10 bang a om hang un Saannu pen a lim sak lo dan in nusia gawp uh a, nasa inki ko ko ta leh honglim sak mel lo lai uh hi.

10:30 pm bang hong hih toh tak teh Nurse khat in hong en a, ka nau uh a samzang na ki dawk ta  hih manin  a lawm te vasam a, Saannu zatui sut khat sun in nau suak sak ding hong ki pan ta uh hi. Siavuan pa in a khuttuam pen a taklam khut ah a bulh hi a,a veilam tawh sawkkha a hih manin  a sangnau pang te in sia aw na khut tuam na leh bulh kha ve a cih uh leh siavuan pan zong ehh.. ci in a khut nih inhong bulh hi. Saannu kiang ah ki hing khia gawp o… Saannu …ih nau a suak nuam lua ta hi, Lau kei o, kei zong hiah ka om buang ve…nau suak pen a ol om lo aki ci mah hi. A hi zong in bang mah lau na ding om lo hi. Ci in Saannu bil gei pan in tha ka pia pia hi. Siavuan pa in a kal lam panin nau sawk sawk a, Saannu kiu tuak pan in Nurse nih in ka nau uh a khut uh tawh sawn kawm leh nengsuk kawm thuah thuah uh a, ka nau lu uh hongki dawk sem sem in Siavuan pa in  khawl lo, 123 ci pai suak in ka vek un Saannu tha ka pia ziahziah uh hi. Saannu zong a na lua a hih teei sam hang in nau suak khin leh a nalua pen dam ding a, ka nau uh zong muta ding cih a lawp na hang leh Topa hong om pih na tawh ka nau lu uh hong pai khia zo hi. Ka naulu hong pai khiat khit teh Siavuan pa in kanau uh a ngawng pan in kai kawm a, Nurse nih in a kiu tuak pan saal khiat pih uh hi. Tua dan in Saannu zong hong ki hing hing teh 10:44 pm lian in kanau uh hong suak khia hi. Siavuan pa in hih na nau uh pen Pasal maw? Numei hong ci in ka nau zangh hong lak a, Pasal ka cih leh Betul !!!! Hong ci in … heh pih na tawh a pua ah na ngak in, ko a nu leh nau hong siansuah kik nung, hong ci hi. Nausuah khit teh Saannu ka et leh nopsa in na nui keei a, ih nau kap na za hiam? Ih nau suak ta lung dam lua hang…siavuan te in  a pua ah hong na ngak in ci uh a hih man in a pua ah hong na ngak ning ci in Saannu kiang ah ka genhi.  

Topa in ka thungetna te hong dawng tak tak hi cih pen kua man hong theih pih loh hang in tel ci pi in ka ki tel hi. Nausuah ol na ding, operation  kul lo in nau suah zawh na ding ka thu nget hong tang tung in ka lung sim hong nuam hi. Kanau uh zong a cidam in, a mel hoih a, bangmah paubaang na om lo hi. Topa hoih na hang bek hi ka ci hi.

10:45 pm in ka pai khia a, a pua ah ka ngak hi. Nai khat sung val bang Saannu tawl dam sak phot uh hi. Sawtsa lua ta ka hih  man in ka va lut kik a, Ka nau uh nawi ka tep sak kau kau uhhi. Ka nau uh ka ho pih a, ka lung sim ah Topa hoih zen si e maw…ci in Topa tung ah lungdam ka ko hi. 11:30  pm teh Saannu lup na khaan Wad 5C, BED 26 ah kapai kik uh hi. Saannu lup na ah nau tawh pai in Saannu in nawi pia kik leuleu hi. Saannu a ding a, moh ka leisa te Saannu in ne a, tua khit teh ka lum sak hi. Security te in khuazan lua ta in na ciah kik in hong ci uh a hih manin ka nau uh leh Saannu nusia in zato pua ah ka pai khia hi. Nausuah ma sangin bel ka lung sim tawm bang a nuam tuam zaw a, zato pua ah tutna neutung khat ah nai 2 sung ka ih mut khit teh ka om na vuah ka ciah hi.

26 July 2013 ni zingsang in ka khua Valvum a om Ka pa(Tun Khan Pau) leh ka nu(Aye May) ka ho pih a, ka nute kiang ah nau suak khinta ung ci inka gen hi. Ka pa in sawt pi lai pekpan in nau min  a phuahsa a hi Tun Khan Pau, Pau Taan Thang  a cih pen khel lo intua mah deih in kip sak suak ing ci  ahih man in ka nau min uh pen Pau Taan Thang ka hi sak uh hi.Sun nai 1:30 pm in  zato ah ka va tung a, nurse te in  tu ni in ciah ta un, bil vasian in hong ci uh a, bil ka va sian hi.  Sum ka va sian leh tul khat hong ci a,ko UN nei hi ve ung discount om lo ding maw ka cih leh sumsianna counter a tu nu in “na UN card va copy in” hong ci a, va copy in ka pia kik hi. Tua ciang  sumsian na a tunu in“deposit Rm800 na piak sa ahih man in sum bei zah pen tulkhat ai teh 500 tung ding hi. Rm 800 na piak sa a hih man in sum cian lai 300 pen nipi khua vak ni in hong la kik in, bang hang hiam cih leh balance a cianlai te laak na counter pen tu ni kikhak  hi” hong ci hi. Nausuah ciang sum tampi a bei khak ding ka lau mah mah khat hi a, a hi zong nau suah madeuh inUN card ngah kahih man un discount  a ngah ka hi uh hi. Topa tung ah ka thu nget na te a tangtung lo, ka ngahloh om lo hi cih ka thei hi. Nitak nai 3 in Selayang zato pi pan ka ciah khia uh hi.

Topa inka thu nget na hong dawngtak pi a, Tapa hong nei sak tak tak ta  hi. Tua ka Topa a minthang tawn tung ta hen.