Ankuang 100

Hun khatlai in Japan gam ah mizawng innkuan khat om hi. Hih innkuan te pen Puteek khat, Nupa khat hi in tua nupa te in tapa khat nei uh hi. A tapa uh pen kum 2 khawng pha pan in a pu tawh inn ah nauki don zelzel uh hi. A nu leh a pa in nasep nei tuak uh a, na sep a neih uh hang in khasum kham loh tawh nuntak haksa sa in abuai pian den inn kuan khat  a hi uhhi. Nikhat hih nupa te a nasep pai na vuah a mawtaw uh kibung in kamsiat na tawh hong nusia mawk uh hi. A tapa neu uh leh a pa teek bek uh nusia sa in hih nupa te in sih na gamzuat san uh hi. Hih nupa te  a sih khit tak ciang naupang no leh  apu bek inn khat ah om uh a, na lah sem zo lo in damdam in a neih sateng uh ne to to in asawt nateh a neih sateng khem peuh hong bei ta hi.

Sum lah nei nawn lo in an nek khat man bek hong nei ta uh hi. A pu in lah sumtha lawh zo nawn lo, a tupa pa lah nau pang lai in sum zong thei nai lo, a huh thei ding lah sanggam dang nei lo sawnsawn uh hi. Sum zon na ding om nawn lo ciang bek hi leh thu khat, a nu leh a pa in lah sum nusiat nei zo sam lo uh  ahih man in hihte putu pen a nuntak uh hong haksa mah mah hi. Nikhat  aputu un a gil uh kial lua ta a hih man in ansai khat hong zuan uh hi. Ansai sung ah hong lut phei uh a, tut na a kiu khat ah hong tu uh hi.  A putu un  a puan uh lah hoih lo, gilkial mel mah mah uh hi. Ihmuh phet in va dong ta kei leng putu hi in bangmah a nei lo uh a hih lam ki thei hi.Ansai pa in bang ne ding nai vua? Ci in dong a, putu te in zong an kuang khat vai khak uh hi. Ansai pa in kuangkhat bek maw? Ci in dongpha kik hi. Banghang hiam cih leh minih  ahih man un kuangkhat bek pen up huai lo hi. Midang te bang in pen mikhat ciang kuang 2 bang ne thei lai uh hi.Puteek pa in kuangkhat bek hi ci in vai khak hi. An hong tun teh  atupa pen gil kial lua a, a kap kap sa a hih man in a tupa pa nesak hi. A tupa pa nek a et kawm in puteek pa zong a gilkial mahmah hi. Hih puteek pa zong a gilkial in a hi zong in sum a nei lo hi in teh cih na tawh ansai pa in puteek pa a ding zong an kuang khat pia hi. Puteek pa in ke’n vai khak keng, ko sum an kuang khat man ding bek nei ung ci in ansai pa kiang ah gen hi. Ansai pa in puteek pa thugen  azak ciang in heh pih  huai sa semsem hi. Ansai pa in “ Kasai ah an ka zuak uh ciang  kuang 100 ka zuak khit sim in  kuangkhat ta pen  a mawkna in ka piakngei na a hi hi. Tu in na tupa nek tawh tu ni kuang 100 cing lian  ahih man in nang ading kuangkhat amawk na in kong pia hi” ci in gen hi. Puteek pa zong lungdam lua in an ne a,  akham uh tak teh ankuang khat man pen sum pia uh a, ansai sung pan in pai khia uh hi.

Atak tak in cileng  hih ansai pa in nikhat in ankuang 100 zong khawng ngei lo hi. Hih puteek pa pen  puan lah hoih lo, a meel ih et ciang lah teek mah mah ta, a tupa pa en leng lah a puan hoih tuan lo, zawngtuak lua mah mah uh  ahih man in ansai pa inheh pih huai a sak na tawh tuabang in a kampau kha  ahihi.

Azingsang teh tua putu tegel pen tua ansai pa sai a ki galmuh na khat ah zingsang tung pan in tu uh a, ansai ah a lut bangzah pha ta hiam ci in sim sim uh hi. A lut te in kuangbangzah ne uh hiam ci in zong gal et et uh hi. Zingsang tung pan in a et et uh a hih manin ansai nei pa in zong a thugensa pen hih putu te in um in ankuang 100 ka zuak a ngak uh hi ngel ding hi ci in um mawh hi. Hih putu te zong  zingsang khuavak cil pan in a ngak uh a hih man in sun lam ciang agil uh nak kial lua mah mah ta hi. Nitak a sai uh  akhak kuan ciang in mi 100 hongcing lian pan in tua teh ansai sung ah hong lut phei uh hi. Zingsang pan in an  angak uh a hih man in nitak ciang in bel hih putu te a gil uh nak kial lua mah mah ta hi.

Ansai pa in ankuang nih hongla khia a, a putu un an pia  hi. Puteek pa in tu ni an kuang 100 khawng bek hi lo na hi hiam? Bang hang in an kuang nih hong pia na hiam a cih leh ansai pa in kasai ah tu ni a hong pai khem peuh in kuang nih ta ne uh a, tu in kuang 200 ka khawng khin hi. Tua hang in kuang nih a mawk na in kongpia thei hi  ci in khem hi.

Bangbang a hi zong in nidang in  ahih leh hih ansai pa in nikhat in ankuang 100 khawng ngei lo a, tu ni in a hih leh kuang 100 khawng cih mawk pen lam dang a ki sa mah mah hi. A zingsang kik leuleu ciang  putu te zong anngak in ansai gei ah tu uh a, mi bangzah lut ta hiam ci in a putu un mit phia lo zen in enzel uh hi. Ansai pa  inzong mu zel a, alungnop lohi. Zingsang pan in a ngak uh pen sun 12 ciang mi 100  ansai sung ah lut khin ta mawk hi. Mi 100 cing khin a hih man in anki nei thei ta ding hi cih na tawh putu te zong ansai sung ah lutleuleu uh a, ansai pa in ankuang nih hong la khia leu leu in a putu un pia hi. Puteek pa in mi 100 bek hong pai pan hi lo hiam bang hang in kuang nih hong pia na hiam ci in a dot leh ansai pa in mikhat in kuang nih ta ne uh a hih man in  tu in kuang 200 cing khin hi ci in khem hi. A taktak in sun 12 ma in kuang 100 bek a zuak khin pan a hihi.Kuang 100 bek cih sam hang in nidang in a hihleh nikhat in kuang 100 zong a khawngngei lo an sai khat a hihi. Tua dan in hong pai to to a,  nitak ma in kuang 100 khawng kik a, tua putu te an piazo zel hi.

Zingsang sim in putu te anngak in hong pai den uh a, nithum ni teh zing sang nai 10 in kuang 100 khawng khin uh a, ni 4 ni teh nai 8 in  kuang 100 khawng uh hi. Hih ansai pa pen a sai uh khawng sem sem a, a sawtna teh nai khat sung in kuang 100 khat khawng ta hi. Hih putu te zong zingan pen sun dong, nitak dong ngak kul lo in zing an, sun an, nitak an cih dan in hunmaan tak in an hong ne thei uh hi.

Hih ansai pa in asai ah hih putu te an a piak ma in a sai khawng lo lua a,a lungkham kham khat a hihi.Hih putu te a pai ni unzong ankuang 100 a khawng lo pi a hihi. A hehpih nop na lungsim, heh pihtheih na  aneihman bekin tua dan kammal zangh kha a, a sawt na teh ansai pa zong a gam ah ansai minthang,mihau khat hong suak zo hi. Piakkhiat na in muhtheih in gah a neih na ki mu thei hi.

Hih thu bang hang in ngaih sun kha dih dih ka hiam cih leh sum 100 khat ih neih lai tak in peek 1 piak ding pen haksa lo hi. Puan, Lukhu, khedap, Pheituam,kawnggak,inn, laptop, phone 100 nei le cin  midang te khat (1) piak ding haksa na sa kei ding hi. Hih a tung a ansai pa zong a piak cil ni in 100 a nei zong hi lo hi. A hehpih nop na tawh  apiak tak teh a sawt na ciang a zah tam pi in ngah kik hi. A mah zong hau to a, putu te zong  agil uh vah in nuam sa uh hi. Ih neihsa te sung panin midang a nei lo zaw te piak khiat ding in ih lung sim sung ah khenkhiat sa ih nei ngei hiam? Na lungsim kiu pan in midangte, nang sang a, a nei lo zaw te khenkhiat ding hun leh a kisam te na piak hiat ding ki tang sam hi. Piak khiat na om lo nuntakna in a luangkhia om lo bualtui tawh ki bang lel hi. Lut lut in luangkhia kei mawk leh uih lel a, kidawn thei lo in a ki man na om lo hi.

Biak inn ah Pasian a ding in sawm ah khat(1/10) pai pih in la, midang te na huh na dingin sawm ah khat na piak zawh kei phial leh zong za ah khat(1/100) pel lo in na piak ding kong deih hi. Neih man hi lo, hauh man hi lo in na lung sim a nop ding kong deih sak man hi zaw hi. Piak khiat na in na lungsim hong nop sak ding hi.