Letsong

Nang kongmuh cil ni in 1/10/2012 ni nitak nai 4:30 pm The Geographer  Advanture Restaurant&Bar (Puchong) a hi hi. Tua ni in kei pen nasep hong lut cil ding ka hi a, office sung ah nasep siau in thudot na Manager te in hong nei uh hi. Tua ni interview ka man khit uh ciang in nasem khempeuh meeting na neih lai tak uh tawh ki tuak a hih man in kei zong Manager pa in nasem  khem peuh tawh hong meihset hi. Ke’n ka min kong gen a, pawl khat te in ka min ciap teh haksa uh a  hih man in  D.T ci in hong ciam teh zong om hi. A diak diak in gamdang mi te in ka min a tom thei pen pen in D.T hong ci zaw uh hi. Kawlgam mi te leh Zomi khem peuh in bel ka min tak tak in hongsam thei uh hi. Kei min zong gamdang mi te in ciapteh haksa uh a, ke’n zong a mau min te ciapteh hak ka sa hi. Nang pen kong muh cil lim lim in kei tawh minam ki bang lehpau a ki bang ding in kong lam en hi. Na ci nasa leh na meel puak zia pen Zomi ding in kong tuat tuat a, ka mipih te zong om ai ve maw… den ciang ho pih ning ei ci in kong hawi sim  hi.

A hi zong in nang pen kong ho pih leh na thei kei a, mangpau in nong dawng hi. Nang pen Philippine te na hih lam tua mun pan in kong thei hi. Nang pen mangpau zong a siam lua na hi kei a, a hi zong in midang te tel theih leh ciam nuih tuam tuam na gen thei hi. Mi dang te in nangpen hong mai ngap uh a,  na thu nuam hi. Nasep kong lut tak tak ciang in nasep ding te, bang ci sep ding cih teng nong gen hi. Hong sai gawp in a ki sia sak na hi kei a, deihska na tawh nong hilh a hih lam ka thei hi. Ansai nasep tawh a ki sai, bang teng theih ding aki lawm om hiam? ci in kei theih ding a ki lawmkhem peuh nong hilh hi. A hizong in nang pen nasep na ah a maikai na hi kei a, makai te na ngawn in nang pen hong kihta sim sim uh hi. Banghang hiam cih leh na pil na leh na theih na pen makai a ki ci pawl khat te sang in na pil zaw  hi. Makai pan  mun ding pen a mun awng nawn lo a hih man in makai a suak lo hi ding in kong um hi. A hi zong in na thu ka theih taktak teh nang pen makai a ut lo, a ki siasak nuam lo, mi a sai nuam lo a thu dik mah mah khat na hih lam kong thei hi.

Puchong sai ah kei kong pai na a hang pen Kepong ah saithak ki hong ding a hih man in no kiang ah tawmkhat hong ki sin ka hi a, sainasep dan hong en a hong pai ka hihi. Tua mun ah kha 1 khawng kong sep khit ciang in kei pen ni pi 2 sung ko saithak hon na ding mun ah ka na pai khol hi. Nang kiang ah ko saithak a ki hon na ah pai ding ka hihman un nang zong hongki tuah in kong ci a, hong ngaih sun lai ning nong ci hi.13/11/2012 ni in saithak ki hong ta ding hih man in nangzong ko kiang ah a sem ding in nong pai hi. Nang hong pai ding in kong lam en kei a, ahi zong in nong pai hi.

Nasep na ah lawm leh gual te na huh a, lawm lehgual te ginat loh na te nasel siam hi. An nek tuidawn lam ahna cingh mah mah a, saidang ah meh lei zel zel in  meh lim no no nong pua zel hi. Kawl an  leh a thuk tuam tuam na duh mah mah a, kawlpau zong tampi na pau thei hi.Sai van zuak na siam a, nang zah a vanzuak siam midang ka mu ngei  nai kei hi.

18/10/2013 ni in na gam ah ciah kik ta ding ci in na thei a, a hi zong in kua mah kiang ah nong gen kei hi. Manager te leh  Office a te bek na thei sak a, kei nong thei sak  kei hi. Hih ih sai ah nasep nuam kasak na  a hang pen nang hang zong hi a, nang tungtawn in pilna tam pi ka ngah lawh hi. 17 ni in nasep  nong pai in singgah nek theih tam pi nong pua a, na sem khem peuh nong  nek pih hi. Zingciang a ki pat nipi khat sung a khuan la ing nong ci a, bang hang hiam kongcih hang in nong gen kei hi. 18 ni in Manager pa in meeting ah hong gen a, nang pen na gamuh a ciah kik na hih lam thei ka hih manin ka lungsim a nuam het kei hi. Nang pen ka lawm hoih mah mah khat na hi a facebook, Viber,Skype… na lim zat mah mah hi. 18 ni zingsang ka thawh tung in na facebook ah nalai at ka mu a, lamdang ka sa hi. A hi zong in nang pen na gam uh a ciah ding in hong lam en nai lo ka hih man in ka lung anuam lai lel hi.

25/10/2013 ni nitak nasep ka pai leh nasep na mun ka tun ciang in Malay te lai hawm te(Postman) khat in kasai vuah van khat hong puak hi. A tung ah Geographic Adventurer ki ci a, hih  van pen ko sai ngah ding a hih lam ka manager pa un thei a  hih man in tua van sung a et leh tua van sung ah kei a ding in singlamteh lim khat nong puak ka mu uh hi.Kei a ding ahih lam bang hang in thei ka hiam cih leh tua singlamteh lim nung ah ka min D.T ci in na gelh se hi.