PASIAN' DEIHNA: A MANPHA PENPEN NUNTAKNA

PASIAN’ DEIHNA: A MANPHA PENPEN NUNTAKNA

Tu kha sungin i it mahmah Dr. Chin Do Kham in hong nusia vat mawk hi. Ama hong nusiat zawh nipi khat teh Tulsa, USA a teng Heilei khua panin Cing Sian Uap (Uappi) kum 18 zong motor accident in hong nusia vat leuleu hi. Lamet loh laitak vive ahih manin i dipkua keei in dah mahmah hi hang. Mihing pen lei panin kipiang hi-in lei-ah ciahkik ding cih pen i theihsa hi napi’n bang hun teh ciah kik ding cih theihkholhna i nei kei hi. Leitung ah i nuntak sungin Pasian’ deihna tawh kituak nuntakna cih pen bang ahi tam? Pasian’ deihna cih pen kammal khat khawng hi na pi’n adeihna leh athu pen zai mahmah hi. Pasian’ deihna i tel theih nading thu tampi sung panin thu thuum tawh kong thapia nuam hi.

1. Amasa in Pasian' Kammal Lai Siangtho panin Pasian' Deihna kitel thei hi.

Piancilna panin Mangmuhna dong simto leng Pasian' geelna leh deihna thute vive i simkha i mukha hi. Atomin gen leng, (a) Pasian in leitung bawl in mihing piangsak hi. (b) Mihing in mawhna bawl hi. (c) Pasian in a bawlsate itna tawh gupkhiatna leh khantawn maang' nading ama geelnate ahi hi. John 3:16 ah "Pasian in leitung it lua mahmah ahih manin a neih sunsun a tapa khat bekbek a piakhia hi. Tua tapa a um khempeuh in kisia loin tawntung nuntakna angah nading ahi hi," ci-in Pasian' itna leh tatkhiatna i mu hi. Tua ahih manin mihing a piang peuhmah in tua itna phawk kha in Zeisu neih masak ding Pasian' kammal panin kitel thei hi. Tua bek tham loin Matthew 6:33 ah "Ahi hangin, Pasian' gam leh ama dikna na zong masa un, tua hi leh  tua nate khempeuh hong kipia tuah lailai ding hi," ci leuleu hi. 

Tua hi-in i lungsim i ngiahsutna ah Pasian' deihna i cih ciangin hong piapa pen i lungsim sungah i neih masak kul hi. Tua loin pen i hunte amawk beibei na hi lel hi. Tua Topa pen Honpa Topa in i neihkhit teh ama gam leh dikna zon' ding kipan thei pan hi. Inn thak, motor thak leh van tuamtuam neihna pen Pasian' thupha ahi hangin Pasian' deihna i tel theih nading tai khat bang khualzin hong kul lai hi. Tua banah ei bangin Pasian' gupna hehpihna thupha angah nailote adingin cii bangin a aal ding leh khuavak bangin a taang dingin Topa'n hong deih hi.

Tonzang ah ka om lai nupi khat a pasal hong pian'thak nading thungetna leh gamtatna tawh mapang hi. A pasal in Lai Siangtho a sim ciangin deih loin balkhiat sak hi. Kikhop ding kha'am kikhawm leh mi lak panin kaikhia cih bangin amau innkuan sungah ze-etna tung hi. A pasal sangsia hi a, Tonzang panin Mindat ah a piat ciangin azi in a vankawm lakah a balnensa Lai Siangtho guan sak hi. A pasal zong cimlua peuhmah in laibu sim ding a zon leh azi guan Lai Siangtho mu-in Hebrew sung simsim hi. A sim kawmkawm in Topa' Kha Siangtho in lawngin khitui luangkawm sa in piangthak hiau hi. December sangkhak sungin Tonzang ah ciah in mi thak lungsim thak tawh a innkuan un Christmas dawn khawm liailiai uh hi. Tua zawh a pasal Korea gamah nasem dingin pai-in Topa' sapna ngah ahih manin Antioch College & Seminary ah sangkah in kawlgam ciah kik in Antioch Lai Siangtho sangah siapi sem hi. Tu'n Trinity College & Seminary ah sem hi. Lai Siangtho pen langnih ahiam tem sangin hiam zaw a, lungsim leh guh teng pailet in Topa' deihnate kiteel thei hi.

2. Thuma'nna (Obedience) in Pasian' Deihna Hi Gige Hi.

Abraham nuntakna i et ciangin Pasian in minam khempeuh i pa dingin thupha kong pia ding hi cih kamciam pia hi. Ahi zongin Pasian in ama omna khua Ur panin paikhia sakin teek dong ta nei loin koih mawk hi. Azi zong ngak zo nawn lo leh teek kisa lua ahih manin a nasem nu, Hagah Izipmi, tawh tano Ismael nei sak hi. Pasian kamciam tapa hi lo ahih manin Ismael suan leh khakte pen tuni dongin a sanggampa nawngkai sak leh a bawl Pasian thei lo Izipmite, Egyptians, suak mawk uh hi. Tek nung guai nungin tapa nei ding cih leengla khualzin mi thuum (Piancilna 18 sung sim leng) in a gen teh Sarah in um ngam loin nui kha phial hi. Tapa hong neih uh teh Pasian in ze-et leuleu in a neih sunsun a it penpen a tapa meihal biakpiakna piak dingin Topa'n ngen hi.

Piancilna 22:2 ah Pasian in, "Na it, na tapa khat bek ahi Isaak, la inla Moriah gamah pai in, tua lai mun-a nang kiangah kong gen ding mual khat tungah meihal biakpiakna in amah hong pia in," ci hi. Hih aw pen ei tungah Topa'n hong gen hi leh i lunghiang mahmah ding hi. Moriah mual lamah Abraham, Isaac leh a nasemte pai uh hi. Abraham in a nasemte nusia in amah leh Isaac mual tungah kahto uh hi. Tua leh Isaac in Abraham kiangah, "En in, mei leh sing om hi; ahih hangin meihal biakpiakna dingin tuuno koi-ah om ahi hiam"(v.7) ci-in a dong hi. Hih dotna pen kha mahmah ding a, tuuno pen Isaac ahih lam thei gige na pi Abraham in, "Pasian in melhal biakpiakna dingin ama ading tuuno hong pia ding hi, ka ta aw,"(v.8) ci-in upna tawh pulak hi. Don Moen in la khat phuakin 

                          God will make a way 

                          where there seems to be no way 

                          He walks in way we cannot see 

                          He will make a way for me

Greek pau in thuma'nna cih kammal pen "akou"kici hi. A khiatna pen listen, hear, obey (ngai, za, mang) ahi hi. Na zak Pasian kammal leh thute ngai-in mang ding cihna ahi hi. Thuma'nna cih pen lam khat ah kiniamkhiatna ahi hi. Kiniamkhiatna cih pen ei deih thute nial in thuma'n ding kisin cihna hi zaw hi. Kei kiniamkhiat ing na cih leh kiniamkhiat nai lo na hi hi. Kiniamkhiatna pen limpha leh gamtatna tawh kilak ahi hi. Abraham in ama deihna leh lunghianna khempeuh nusia in Pasian' deihna za, ngai in ama thu mang ngeu hi. Topa'n biakpiakna dingin tuuno khat sawllak panin pia hi. Upna leh thuma'nna pen kizui hamtang hi. Thuma'nna pen Pasian' deihna na hi gige hi.

Abraham bangin i it penpen tawh Topa'n hong ze-et mawk leh baih lo ding hi. Ahi zongin thuma'nna pen Topa' deih mahmah thu khat na hizaw ciuciau hi.

3. Haksatna panin Pasian' Deihna kimu thei hi.

Job pen a neihsa khempeuh leh a tate na ngawn kilakkhiat sak hi. Pasian in banghang in hih bang thute phal ahi hiam ci-in dotna tampi nei kha ding hi hang.

Samuel Masa 1 sung i sim teh Hannah pen ta nei lo ahih manin neu-etna, simmawhna leh lungkhamna thuak dikdek hi. Haksatna lianpi khat ahi hi. Hannah zong biakinn sungah pai in thungen kawm in a lungsim tamzan in Topa maipha zong hi. Amah pen a awging kiza loin a phunphun tawh kibang hi. Pasian nasem siampi Eli in zukham sa liangin "Bang tan vei zukham ding na hi hiam? na kiang panin leenggahzu hemkhia in," (ISam 1:14) ci hi. Hannah in, "Hi lo hi, ka topa aw, keimah in nakpi takin a lungkham numei ka hi hi; leenggahzu ahi a, kham theih zu ahi zong ka dawn kei hi, Topa mai ah ka lungsim a sungkhia ka hi hi.Lungkhamna leh gimna tawh a pau ka hih manin numei ginalo bangin na nasemnu hong ngaihsun kei in," (vv.15-16) a ci hi. Atomin gen leng Topa'n a thungetna dawngin tapa Samuel pia hi. Samuel cih min aphuahna hang leh a deihna pen "Topa tung panin amah ka nget ahi hi." (v.20)cihna ahi hi. Pasian pen itna, hehpihna tawh kidim ahih manin Hannah nget loh ahi tapa thum leh tanu nih piakbeh lailai hi.

Ka lawmte khat Lai Siangtho sangkah dingin sang zongzong hi. US ah sangkah pen kisap tam sak mahmah in nawngkai peuhmah hi. UN min leh ama min kibang lo cih bekbek zong vai pi khat ahi hi. Ama sangkah nopna sang pen ama inn tawh kinai mahmah hi. Ahi zongin senpi loin ama inn panin minutes 45 bang paina sang khat ah a siauh leh lamdang takin ngah pah hi. A sang pai ding nite leh ama nasep hunte kibang leuleu ahih manin ama nasep a khawl kul mawk hi. Sang pen nipi zawh ni nih teh sangkah ding hi ta, ni nga ni sun in internet panin ama nasep Nurse Assistant nasep khat mu in laikhak hi. Sun nai khat pawlin a laikhak pen nitak nai 5 pawlin interview kisam in nasep ngah pah hi. Topa pen zekai lo leh hunlap den Pasian ahi hi. Haksatna cih pen Pasian minthan' nading na hi zaw hi. John 9 sungah a suah cil a kipan mittaw pasal khat a om hi. Zeisu nungzuite in kua mawhna hangin mittaw ahi hiam? a nu leh pa' mawhna hang ahi hiam?" (9:2) ci-in dong uh hi. Zeisu in kuama mawhna hang hi lo hi. Pasian minthan' nading hi ci hi. I haksatnate pen Pasian' deihna i theih nading hizaw a, ama minthan' nading hi gige hi.

Tua ahih manin Pasian' deihna cih pen a tom mahmah a bat hangin adeihna pen tangzai mahmah leh thuk mahmah hi. Lai Siangtho simna tungtawn panin Kha Siangtho in Pasian' deihna hong thei sak hi. Abraham bangin thuma'nna tawh a neihsun a tapa meihal biakpiakna a piak ngam bangin Pasian' deihna kimu thei hi. A tawpna ah i haksatnate pen Topa'n ama minthan' nadingin a geel khinkhian na hi gige hi cih phawk tek ni. Topa'n thupha hong pia kim ta hen, Amen!

Topa' Leenggah huan pan,

Rev Zam Sian Piang

Lead Pastor 

Grace Burmese Church

West Chicago, IL