Sikhuup

Ka nasep na ansai ah nasep ka pai ding nak leh laikung(Ball pen),laidal(Note book), meisai(Lighter),wine thawlsin honna(wine opener), nasep na card cih te puak loh pha mawh ham tang hi. Nidang in a hih lehka van puak teng  pen ka ipsung ah ka puak zel hi a, nasep ka buai pian ciang in ka wine thawlsin honna pen  ka ipsungah pua lo in, ka ngawng ah ka ok hi.  Customer  te wine thawlsin hon ding a om ciang ipsung pan in lakkhiat pat pat pen ki ziakai a hih man in a manglang thei pen ding in ka ngawng ah a ok ka hihi. Hih ka wine thawlsin honna pen ka ngawng ah ka ok zawh ni khat ni nih khit khawngteh nitak khat nasep ka man ciang ka vanteng hem in ka wine  thawlsin honna ka et leh ka wine thawlsin honna ah sikhuup khat na om mawk hi. Hih sikhuup pen koi pan a, hong pai hi ding hiam? Ka guk lah hi lo a, bang mun a ka pai khak lai tak in hih ka wine thawlsin honna leh hih sikhuup ki sukha hi peuh mahding hiam? ci in ka ngaih sut sut hang in ka ngaih sun zo kei hi.  Kei zong tua sikhuup pen lakhia tuan lo in a hi ci bang in ka koih suak hi. Tua khit zawh ni nih khawng teh ka wine thawlsin honna ah sikhuup khat mah hong  ki behlap leuleu hi.Sikhuup nih  ka neih ciang  sikdang dang te pen huup nop lua mah mah ta hi. Tua lai tak in ka phawk khat hong om hi.

A masa  in ei pen a hawm pi ih hi hi. Bangmah ih hih thei omlo hi.Sik khat leh sikhuup khat a ki mat khit teh a dang sik te zong huup beh thei lai hi. Ih nuntak na ah Topa Zeisu pen gumpa leh honpa a ih san masiah siah pen a hawm pi  ih  hihi. Topa Zeisu in ka honpa hi, ka gum pa hi ci in ih sangtak teh en zong midang te Topa a ding in ih behlap sak thei a, ih sam thei hi.Sik in sik bek mah huup thei hi. Na dangdang te huup thei lo hi. Mi hing te ih nuntak na ah bang in hong huup hiam? En bang huup a, ei bang in hong huup hiam?

Sikhuup khat ka neih cil ni in a  hih leh bang mah in ka thupi ngaih sut nai kei a, tua sikhuup khat tung tawn in sikhuup dang ka neih beh ciang “Aw…Topa nang hong nei hi peuh leng na dang dang te kei ma khut sung ah ol no tak in nong puak zen maw” ci in ka tel theih hi. Mihing te ih nuntak na ah bang thu pi pen hiam? Sum thu pi pen  hiam? Cidam na thu pi pen hiam? Mel hoih na thu pi pen hiam? Thu pi pen dek lo hi. Ih Biak Topa Zeisu khazih bek mah thu pi ngaihsut ding hi hang. Tua Topa nei peuh leng na khem peuh ih khut sung ah hong omlel ding hi. Sikhuup khat in a dang sik te a huup mah bang in Ih nuntak na ah zong midang te  ih huup theih ding zong ki sam hi. Lungdam na thu, Topa hoih na thu pen mi khem peuh theih sak ding hi a, ei a ding bek hi lo  hi. Mi dang te zong ei tung tawn  in Topa kiang tun pih ding zong ih tavuan a hihi.

Sikhuup in a dang sik te a huup theih mah  bang in ih kim ih kiang a om Pasian thu thei nai lo te, Pasian thu thei sak a, ei lam ah ih huup theih ding ki sam hi. Ei Christian te in zong Pasian thu a thei nai lo mitam pi te a huup thei ding in hih laisim mimal kim kong deih bawl hi.