Thursday, October 24, 2013 [Kap Khan Khual]
Yangon (ZCD.Info): ZCD-President Pu Chin Sian Thang munlakna 1:23 pm in hun kipan hi. Gam leh minam, democracy ading a nuntakna apiakhia, hamsakna a thuak, kolbulh khaukhih a thuakte zahtakna piakna minute 1 sung kinei pah hi. ZCD-General Secretary Pu Gin Kam Lian in Lai Siangtho Paunak 14:34 simna neih khitciang, “Lung Laulo aw, Zogam Lei aw” mipi’n nuapci takin sa-in azom-ah Rev. Lian Do Nang in hunap thungetna hongnei hi.
ZCD-President Pu Chin Sian Thang in ZNC/ZCD thubulphuhpi (5) te gentelna nei hi. “Nidang in akigen ngam ngeilo i thubulphuhpi a-hi Paunak 14:34 tu’n i gen ta hi!” ZCD-President in thubulphuh (4) ban-ah behlapna ngeina tak-in gen khia hi. 2014 census ciang minam cih na mun ah Zomi cih theihna ding akisai department tuam tuam ah laigelh khit cih zong gen hi.
U Aung Thein, constitution amending committee member-NLD, in Burma Constitution kigelh ngeite hong pulak khia in 2008 constitution thanemnate gen khia hi. Galkap ukna mah hi lai hi ci hi.
“Zo Laukha Pallun Ding” mipi’n dingsa-in sa in, Rev. Gin Khan Dongh in Topa’ thupha ZCD a ding ngetsakna nei-hi.
U Myat Ko,Yangon School of Political Science, in zong thugenna nei-in Zomi Party tawh sepkhopna ngeinate hong gen hi.
Daw Zin Mar Aung, Yangon School of Political Science, in zong Burma sung ah silver jubilee a bawlzo party tawm mah mah hi. “Hun hamsa’t mah mah lai- a kipan tudong a dingzo bek thamlo silver jubilee a khamzo ZNC/ZCD in diamond jubilee, centenary jubilee dong hong gualzo ta hen!” ci’n thapiakna leh a thupi’t sakna hong gen hi.
Miss Mindy Walker, Richarson Center Global Exchange, in hun hamsalai pek a kipan tudong kum 25 sung minam a ding semzo ZNC/ZCD thupi mah mah ci’n thugen na hong nei hi.
Chin State Tedim ZCD-President Pu Zam Khat Suan in Tedim ZCD vai leh ZNC kipuah cil lai nasepnate hong pulaak hi.
Tonzang ZCD-President Pu Do Khan Lian in Tonzang ZCD vai teng hong gen hi.
Kalay ZCD- Representative Pu Lian Sian Suang in zong Kalaymyo ZCD vai hong pulak hi.
Pu Khen Za Sian, Zo Aw chief editor in lungdam pihnalai hong khak hi.
Rev. Neng Thian Pau, Kalay Valley Baptist Convention-Secretary in zong lungdam pihnalai hong khak hi.
Rev. Pau Khan Khai, ZBCM-President leh Rev. Gin Khan Khual, ZBCM- General Secretary in zong lungdam pihnalai hong khak uhi.
Pu Dam Khaw Nang in zong Zomi sung ah kipawl zawhna ding leh “Chin” mah a deihte zong et khelhloh ding hong pulak hi.
ZCD-General Secretary Pu Gin Kam Lian in tulaitak ZCD-Central Executive Committee panmun late mipi’thuki’mna la-in, mipi’n “Thukim” ci’n tongko uhi. “Tu kum beima Party Conference bawl in panmun khempeuh mipi thukimna tawh khensat ni,” cih zong pulak hi.
Pu Ngin Thang, 1990 NLD MP-elect- Tedim Constituent (1), in minam party thupi hi ci-in “Kum 2 bang National Convention kakah sung 1 vei bek bek thugen khuan ngah in tua zong NLD-CEC lai gelh khit khat a simkhia theih bek hing. Ka kah pih minam party pan MP te’n amau gelh ziau in hong sim khia ziau hi.”
Dr. Cing Pum Nem in 4:00 pm in huntawp thungetna tawh silver jubilee hun gualzo tak in ki zo hi.
Silver Jubilee bawl zawhna ding hong panpih khem peuhte tung ah ZCD in lungdam mah mah hi.
• Note:
o Silver Jubilee Hong Sim Khua-------------- 37
o Silver Jubilee Hong Sim Party-------------- 3
o Silver Jubilee Hong Sim Organization-------2
0 Tongkum :
Post a Comment