Zo Deih Vontawi ~ Korea pan Zomi Video thak

Leitung ah mipil tampi takin amau lungsim ngaihsutna tektawh kizui in Video Drama na bawltek uh a, tuate ih etteh zongh minthang mahmah le hoih thei mahmah in, ih lungsim ong vutthei mahmah ban ah, ih et khakteh ih khuasik mulbang ong thosak lianghi. Muhnop lua kisa ciltui bang kailiang zen theihi.Tua bang a, amintang Video tampi telah ah a diakdiak in Leitung bup ong zeel le ong buaisak, an-nek tuidawn le lup-hun cihte nangawn ong kipelhsak pen Korea te Video Drama hi phadiak hi.Tuazah a, Leitung bup in adeih phatdiak na gam pan Pasian deihna ciding ih hiam, ih mipih Zomi te’n zong Video khat ong bawlkhia thei uh ahihman in, ki angtang mahmah hi. Korea ah cikmah a Zomi te’n Video akibawlkhia ngei ngailo hi a, tutung a pen akipatna ongsuak bilbel dinghi. Hih Video thulu pen atung a ih atsa “ZO DEIH VONTAWI” ci’n minvawh uh hi.

Hih Video ong bawlkhia pen ZONUS (Zomi National Uplift Society) Pute hi a, veina tampi a kigawm teh hibang thu ong piangkhia ci uh hi. Hih ZONUS in mailam ah Zogam lam a om Zomi te sung pan ahuhtaak ,alapsang taak aomleh ahihzawh zahzah un huhding le panpih ding cih lunggulhna in, hih ih Video ong kibawl khia uh hi. Hih tungtawn a ,a ngahzahzah sum le paai tawh ZOMI te panpih cih ngimna lianpi nei uh hi. Tua hi in hih Video ong kihawmkhiat ciang akua mapeuh in thasial lo a, ih panpih kimciat na ding zahtaakna lianpi tawh kong thum hi. Hih ih Video na et limlim nakleh khiallo bektham loh in, Lesson tampi zongh ong piakthuak lai ding hi, cih ong kamciam ngam hi ingh. Hih Video tangthu sung ah aki bulphuh phadiak ahi “namdang lawmnu/zi neih hoihmaw hoihlo, innkuan sung ah Zi te’n Pasal te azawhluatzia le, sum le paai in leitung ongzawh zia hoih maw hoihlo” cih te a kipan ong kihel kim dimdiam ding hi. Actor le Actress te zong siam thei mahmah mai uh hi. Hih Actress te sungpan Korea nungak te zong kihel thei uh a, zongh asiamban vuah amel asa uh zong etlawm ngikngek mahmah in, hih Video tawisang tuam mahmah hi. Tuaban ah Korea khuasung munthupi te zong na mukha beh laiding a, Korea khuasung bang na teltuam phial ding hi.

Tua hi in, hih Video asawtlo in ong kihawm khiading ahihman in muntuam gamtuam aom kong it Zomi akua maciat in gam le minam na itna un, khat le khat ih vaihawmna te, ki panpih ciatni cih ong tangko khia hi ingh. Lungdam Topa’n thupha ongpia kimciat tahen!

(Comment/Ngaihsutna na piaknop leh  zonus311@gmail.com ah kipia thei hi cih ongtheisak nuam ingh.)

Mapang khawmni,
Zonus Pute
(Korea)

Zo Deih Von Tawi Trailer HD

Lungdam..