UN minsanna kizom tothei :: ZAM Card tawi Zomi te adingin UNHCR minsanna pen abeisa kalbupsung nuamtak in kizom tothei hi. UN Officer te’n October 22 & 23 ninihsung bekbek Tau (Wristband) aki bulhsakteng pen nungkalsung Monday panin Friday nidong buaipihkhop mahmah uhhi. Nisim mahin UN Officer te’n Interview bawlpah ciatciat uh a, UN Card hongpiaksak pahpah uhhi. Innkuan lutpih, zi leh pasal lutpih, sanggam lutpih tengtawh avek in akigawm Zomi 3000 val bangin UN Card hong ngahlawhpah uh ahih manin ki lungdampih mahmah hi.
Hih Tau bulhsa teng amansiang khitciang in adang te hong zopsak totoding uh hi a, aniding bek aki ngaklai ahihi. Tua ahih manin UN minsanna a ngahnailo te bangmah lunghimawh nading omlo hi. Lungduai takin ih ngak hit-hiatding lohbuang adang omlo hi.
Acianlai ZAM Card tawi Zomi te ading aki piak hunding ki theician nailo a, UNHCR pan hong zaksakkik phet un mipi tungah hong zasaksawn pahding hi ung.
Zomi Cup 2014 ading Meeting sapna
Hongtungding Monday (04 November 2013) 1pm hunin ZAM Hall ah Zomi Cup 2014 vaiding Meeting neinuam ihhih manin alunglut khua makai te leh Football makai te nong paikimciat nading un kongsam uhhi.
Zomi sung bek hilo in leitung bup Zomi tangthu-ah team tampen Zomi kampau kibang vive in ih bawlkhop Zomi Nam Ni pawipi hun sangin mai kum Zomi Nam Ni dingin hong naihzawta hi. Zomi Nam Ni pahtawina aa ih vaihawm Zomi Cup Tukpeng Kidemna pen 2014 Sen Kumthak hun tengah A (5) Veina ki vaihawm leuleu ding hi.
2010 in Team (8), 2011 in Khua (19), 2012 in Khua (26), 2013 ciangin Khua (40) Team (41) in ki lawmtatna leh Zomi te-in khangno sung, mihon vaihawmkhop zong ki vaihawm khawm thei lua hi, cih ih lakkhin zo hi. 2014 ah kua Khua teng kihel ding ih hiam? Kua Khua teng kiging khin? Bang ni, bang hun tengin vaihawm le'ng a beisa hunte sang' picing
zawlai ding cihte kikum khawmding hihang.
Dr. Do Kham sihgalna :: ZAM makaihna tawh Malaysia gamsung aom Zomi te’n ih Zomi makaipipa phawk na Memorial Service pen ZAM Hall ah October 19 ni in kibawl hi. Malaysia gamsung pan Dr. Do Kham sihgalna akigawm RM4000 bang ki ngahkhin a, apianuamlai aomleh November 04 nidong hongki ngakding hi. Tuani khitciang in akingah khempeuh USA ki khakding hi.
Malaysia aom Zomi te'n ih Phawkding Thu
Gamnuam zaw tuntheih nading ut in, inn le lo nusia a ih gam ihlei nusia in Malaysia gam tungkhin Zomi teng in ih mailamding thu ih ngaihsut kawmkawmding thulianpi khat om gige ahihlam hih lai tawh hong theisak nuam hi ing.
UN ngahsa te'n i theihding in ah nung kum in Thailand Refugee Camp khat pan US ulian khat in a genngei thu khatpen theikhinding in ong lamen hi ing. Tuapa genna ah tukum June kha masiah USA gamleng nuamte min sazin hong piateng bek USA ah kisam laiding a, tualo June kha khit a khempeuh USA ah kisam nawnlo ding hi cih thu a hihi. Tua tawh kizom in Malaysia ah zong kipawlna makaite lunghimawh mahmah uh a, dotna tampi kinei hi. UNHCR makai lam te'n Malaysia ah tuadan thu omlo hi acih uh hang thu tampi akikhel lam ki thei mahmah hi.
2010 August kha ma a register (UNHCR minsanna) ngah khempeuh pen RST akisap teh ut in ut ta kei leh USA pia uh hi. Ahi zongin, 2013 Febuary kha akipan RST interview khempeuh pen USA kipia nawnlo in, Australia lam kipia mangkhin ahih lam ih theih a hihi. Tua ahih manin tuciangciang US aleng aom ziahziah hang 2010 August kha ciang a Register ngahman teng ahih keileh tukum Feb/March kha sung a USA gam teelna angah teng bek mailam ah USA lengthei laiding a, adangteng pen USA te'n la nawn kei leh Malaysia ah kum tampi takmah ih om hong kullai khading hi cih kei muhna ahihi.
Tu'n UNHCR zumpan Sep 02 ni akipan minsanna piading cih thu hong om mahbang in mipi tampitak kilawp leh kidah giugiau khading hi. A hang in March kha ni 6 masiah min sazian akipuak sateng bekmah lakding cih thu omzel ahih man a hihi. Tutung minsanna pen UNHCR in zumpan amau mahmah in Phone tawh samding uh ahih manin tuasung ah Phone laih man pawl, Contact ki ngahlo pawlzong tampi om ding a, kum tampi ngakkhin, ahihhang kei hongki samkhalo cihmah ih mipi sungah hong om ziazua laiding hi.
Atung a thu khenkhat i khinkhai ciang in, gamthuna vai ah USA in Kawlgam mi alak uh hong khawl suak leh Malaysia pan USA gam tuntheih nading lampi hong om nawnlo thei khading in ka um mawh hi. USA in gambel te lanawn kei zenzen leh adang gam tuamtuamte lak pen cihtham hetlo ahih banah USA in alak ziahziah zong pen UN ngah zawh atawm pen kum nih pan kumthum bang kingak lai hi. USA in la nawn kei leh kum bang zah Malaysia ah ih omlai zentam?
Sum thalawh nading leh Malaysia ciangzong nuam lel e aci pawl ading in bel lungkham kul khollo hina ven, ahihhang gamthumna atung nuam valvalte ading in, Malaysia pen hun hoih hinawnlo ahih lam ki cian mahmah ta hi.
Tua ahih manin, kong it ka mipihte aw gamthumna vai tawh Malaysia tung a, tu a UN ngahsawm te leh 2010 kumbei khit a ngahte hita leh UN vai tawh Malaysia hong pai khempeuh Malaysia pen ahun hoihlam hinawnlo hi, delhhuai nawnlo hi, a omsa tezong cikciang lengtheiding cih lungkhamhua ahihlam kong theisak hi. Nang Khan Pau
Zolia leh Zotaang in Zomi Khuado zeemta
(Khuado Pawi Report - nungkal pan azom)
Round nihna ah mark 1663 tawh Monica Mua Muan in Photogenic leh Ztaangpan in mark 2173 tawh tg Pau Muan Lian in liimsun pahtawina ngah uhi. Amaute nih Deih Mang in minute khatsungta lungdamna thu gensak hi.
Zotaang Topten kitelna kipanta hi. Tua Zotaang Topten ah Thawng Deih Kim , Michael Tuang , Khual Sian Mung, Thawng Hat Lal, Tuan Za Mung, Pau Muan Lian, Tuan Za Mung, Pau Biak Siam, Tung Sian Muan Tuang, Khai Cin Hau, kihel hi.
Zo Lia top5 kiteng khia leuleu a, Uk Lian Cing, Lun Sian Cing, Ciin Suan Niang, Monica Mua Muan, Mary Hau Nuam hiteng kikhia leuleu ahihi.
Knowledge Tuamtuam thudotna :: Hih muhna theihna thudotna nasiatak in kibawl a, amaulam ethet lohpipi knowledge hau ding in mimuan huai Deih mang in mi 10 tel khiatsa in nei in dong a, dong pakpak thei lo honk hat ki om in mipi kiawngziahziah hi. Akidong thute atamzaw in gam leh minan itna , kimakaihzia ding Zolia Zotaangte ngaihsutna , gampua om naupangte pattahzia ding, Dr Do Kham tungpan etteh huaithu, Dr Do Kham in Zomi leh Zogam ading mailam nasep zia ding agimna Australia apai hun a, agen thute,(Zomite masuanah sep ding)te, Tua ban ah Zopau siamzia cih Pu Hang Khan Lian in dotnate,Dr Pau inadot’ Na itmahmah tung ah nagenkhiatngam hetloh lohthu te ( adiak in lawmngaih haudiakte cihnopna) thudotna ki bawlhi.
Zopau kisiam hetlozia leh tanglai kamal te akikanloh zia Zogam ading minam a ding ngaihsutna ineihlohzia kilangsak mahmah aa, khangno te tungah hongki lang khia mitampi in khua phawk kikna athak neisak mahmah ahihi.
John Chin Thugenna :: John Chin tautung hong kah tota a, mic atawi khitciang “ Mingalaba” Dammaw hong ci masa ahih man in mipi Dammm ci zeizai hi. Khua do thupha notengtung hongtungta hen, Ki-itna kilemna, kipumkhatna in masuan vangsak hi. Gualzawhna hi cih bulphuh in hanthotna kiciam tak nong nei a, Topa’n thupha hongpia kimciat tahen ci-in short speech tomno hong nei hi.
Pu Hang Khan Lian thugenna :: Pu Hang Khan Lian in atamzaw in minamthu limcitak in hong nei hi. Zomi nam in kilawhding leh GZA, ZCD, 3rd ZC khawmpi the ah thulimcitak in ineih theih na ding in innlamomte tung ah thuvaikhak na kician neih hamtang ding kisam ahihna thu hong gen khia hi.
Zomi in Zogam kinei nailo ahihna leh akikhawmtawm leitangh tungah akiteng ahihna hilhciandiktak in hong nei a, leitangh neihna ding leh ineihsa leitangh tungah thuneihna anei Zomi isuahna ding hanciam hamtangding akisap na thu mipi tungah limcitak in hong hilh ngekngek ahihi.
Hongtung ding 2014 hun ah kawlgamsung om minamte amau minam diktak tawh kisapna kiphalzo kihongzo ahihna thuzong honggen khia hi. Tua hihman in Zomi ci-in kilo ding hanga, ZCD Tedim apaizong NLD Tedimapaizong in minam min te ah Zomi cih hamtangding kisam ta hihi cithu hilhna nei hi.
Tuaban ah Kawlai in Zomi hong kikhensak hi . Bang hiam cih leh Zomi pau tawh min kigelh Cun BiK bang pen Yangon ah lampi min in akigelh ciang in mannawnlo zo ahihi. Tua mahbang in Zaw akici te Zomi hina pi kawllai in minam hong kikhensak ahihi cih hilh diktelna nei hi.
Etteh ding in Mizoram ah Mizo bekmah teng in namdangte munleh mual leitang neihna pai hetlo ahih man in akip ahihi cihi.
Ladawng thum kizomsakna :: JK zom, Lentong Pauno, David Mung leh alawmte in lasakna dawng khatpai tek nei uhhi. Tua lasak khit phet in Sia Kam Mung In adeihzangzah in agingtak in awng a, KUATE KHUADO” Mipi in “ ZOMI KHUADO” nihveita kici ziahziah hi.
Zotaang 2013 Malaysia te ::
3. Mat 820 tawh Tg Khai Cin Hau in athumna ngah a, Trophy, Sash, Bouquet leh Rm 300 pen Pu Hang KhanLian in pahtawina pia hi.
2. Mat 860 tawh Michael Tuang in anihna ngah a, Trophy, Sash, Bouquet leh Rm 500 pen Nu Cing Leh Pa Pau in pahtawina pia hi.
1. Thawng Hat Lal in akhatna Zotaang 2013 Malaysia ngah aa, Trophy, sash, Bouquet Rm 700 pen Aungnandawr in pahtawina pia hi.
Zolia 2013 Malaysia kitelna te ::
3. Mat 810 tawh Ciin Suan Niang in athumna ngah a, Crown Sash Boquet leh Rm 300 John Mung te innkuan in pia hi.
2. Mat 820 tawh Lun Sian Cing in anihna ngah a, Trophy, Crown , Sash, Boquet leh Rm 500 Khuado Committee in pia hi.
1. Mat 985 tawh Uk Lian Cing in akhatna ngah a, Trophy, Crown, Sash, Boquet leh Rm 700 Phillip Muang ( Tuangzalat Restaurant ) te in pia hi. Reported by Hau Thang
ZAM Hall ki kawmthei :: ZAM Hall pen Session khat (nai 4 sung) RM200 ki lading a, nai 4 khitciang azatbehtoh nopleh naikhat RM50 ki lading hi. Aki zangthei vanteng: Aircon, Tutphah 150, Sound System, Wired Mic 1, Wireless Mic 2, Usher Counter leh adang tuamtuam. Alunglut te’n hih Phone 010-823 0571 ah naki zom un. Note: Guihtheih khamtheih zat ki phallo hi.
ZAM ah Ngeina Puan ki leithei ta :: ZAM zumpi ah ih ngeina Zopuan te ki leitheita hi. Aki ngahthei van te: Zopuan (pasal), Zopuan (numei), Puandum, Zodial, Zodial naikhau (silk), Puanlaisan, Tanghciin, Khephiau Dotbehnop aomleh Siama Ngaih Hau 010-823 0571
Lungdam kohna :: John Mungpi (Klang Zomi Ansai) te innkuan in Thupuak bawlnading RM200 hongpia ahih manin ki lungdam mahmah hi.
Kamphen te panpihna :: Malaysia Zomi Churches Association (MZCA) panin UN minsanna ah kamphen te panpih nading RM1290 honghuh uhhi. Niang It Lian leh Niang Lian Dim te lawmta inzong UN Tau angah uhciang in lungdamlua uh a, Kamphen cialnading in RM50 tuak hong piakhia uhhi. Mimal leh Pawlpi pan panpihna hongpia te tungah ki lungdam mahmah hi. Adang hong panpihnuam aomlehzong lungdam takin ki sangding hi.
MZCA Calendar & Ordination DVD :: MZCA pan akibawl 2014 kum ading Calendar ki ngahta hi. MZCA Ordination piakna DVD zong ki ngahta hi. Adeihte’n 017-334 2760 ah ki Contact theihi.
ZAM Card (atuh = Imitate, Fake) :: ZAM zumpan a kibawllo, mundangpan aki bawltawm ZAM Card tawh UN minsanna honglutsawm te UN Officer te tungah hongki Report pahding hi. Khasia keini, ih gamtat kidawm ni.
Address:
155A Jalan Maharalela,
50150 Kuala Lumpur
Office Tel: 03-2142 6659
Hotline: 016-293 9027
Email: zomiassociationmls@gmail.com
Malaysia gamsung aom ZAM (Zomi Association of Malaysia) panin Zolai tawh kalsim in Newsletter neiden uhhi. Kuala Lumpur khuapi sung aom Zomi te kikhopna Biakinn Churches tuamtuam leh Zomi te paidiakna ansai Restaurants tuamtuam ah Printed Copy kikoih kawikawi hi. Ahi zongin Kuala Lumpur khuapi tawh aki gamla aom khuate ah ahunlap in ki ngahlo ahih manin, tuate ading khualna leh Internet azang leitung muntuamtuam gamtuamtuam aom Zomi te ading khualna tawh ZomiDaily website tungpan kongsuaksak zelzel uhhi.
0 Tongkum :
Post a Comment