ZAM Thupuak 10/11/2013

ZAM :: Zomi Association of Malaysia
ZOMI CUP - 2014
Malaysia Zomi sung bek hilo in leitung bup Zomi tangthu-ah team tampen Zomi kampau kibang vive in ih bawlkhop Zomi Nam Ni pahtawina aa ih vaihawm Zomi Cup Tukpeng Kidemna pen 2014 Sen Kumthak hun tengah A (5) Veina ki vaihawmna hita hi.

2010 in Team (8), 2011 in Khua (19), 2012 in Khua (26), 2013 ciangin Khua (40) Team (41) in ki lawmtatna leh Zomi te-in khangno sung, mihon vaihawmkhop zong ki vaihawm khawm thei lua hi, cih ih lakkhin zo hi. Malaysia ah tul tampi gambel aa ih tun' khit nungah, kimawlna lam laamsang ding ci-in Zomi Cup 2010 pan kipan khia hetlo hi! Kimawl ukteng kithuah khopna leh kimawl uk pawlkhat ii vaihawmna cih ciang tawh zong a ki hanciam hilo hi. Ih minam Zomi pulakna, lapsangna ding aa Minam Ni pahtawina kawmin aki vaihawm ahi hi.
Tua ahih manin, hih Zomi Cup ii thu leh vai khempeuh ah ahun leh mun zuisak aa min tuamtuam a neilo Zomi akici tinten Zomi te bek mahin makaih ding hi. Tuamah bangin, ahun leh amun peuh zui aa min tuamtuam apua thei Zomi te kihelna ding hilozaw hi. Tuhun taktak ciang, tuabang aa khuahun, kim le pam, lawm le gual omzia peuh zui aa mi hong ciapteh min khat peuhpeuh tawh min vawh a thuak ziauziau dingte ih hihlohna a lakkhawm dingin zong ngimna tawh aki vaihawm toto ahihi.
Hidan teng hang bek tawh Zomi Cup ki vaihawm hilo hi. Minam Ni mahmah pahtawina in 2010 pan ih vaihawm ahihi. Minam Ni anei minam khat ihihna aki
langsak zo vaihawmna lakah a limci penpen khat hiding hi.

Tuaciang bek hilo-in, zum tuamtuam leh ih kim le pam aa namdangte ngiatin hong muhna mahmah ah ih lahkhiat zawh thu khat penin, haksatna tampi om himah ta leh, Zomi te in vai lianpi tampi vaihawm khawmzo hi ungh, cih pen ih lahkhiat zawh a thupi mahmah ahihi. Angtang kipaak huai hi!
Namdang tuamtuamte hong theih semsemna leh hong etneu ngamlohna dingin zong a kisam vai lianpi khat hipah lel hi. Sianggen le'ng, hong zahtak zawhna ding ciang uh vai lianpi a lakkhia ihihi.
Pawlpi kibanglo, Beh kibanglo, Khua kibanglo Zomi khangno cidam sinsen hizah takin kum simin tukpeng vai bek zong hici vaihawmkhop zo mawk ihih leh, ih sepding vai lianpi maban dang atuamtuamte-ah, thutang tak aa makaihna leh citak tak aa nungzui siam hihnate kimu semsem laiding hi.
 
Zomi Cup Kihel Dingte Zuih Ding Thu Khentat Thute

1. Zomi Nam Ni pahtawina-in ih vaihawm A (5) Veina Zomi Cup 2014 tukpeng kidemna a ding kikupna pan zuih ding khentat thute anuai a teng hi.
2. Zomi Cup a kimawl ding khat a pianpih kam pen Zopau azang Zomi hi hamtang ding
3. Zomi Cup kimawlding peuhmah in Zomi hihna ZAM Card ahinglai tawi hamtang ding
4. Zomi Cup kimawl ni ding pen January 24, 25 leh 27 - 31, February 1 sung kisui ding hi.
5. Zomi Cup kibawlna dingin Taman Pudu Ulu (Thangho leh Liando) tualpi mah zatding in kigel hi.
6. Zomi Cup kimawl ding Khua/Team peuhmah in a nunung pen 31 December 2013 nitak 5pm ma-in ZAM zumah kimawlding te min sazian, lutman leh Deposit apkim ding.
7. Khuakhat panin Team khatbek ki mawlthei ding.
8. Khua/Team khat a kimawlsa mi adang Khua/Team ah kimawl kik thei nawnlo ding.
9. Khua/Team khatah kimawl ding mimal a tampen (20) ciang ki ngah.
10. Khuadang pan mi (2) ciangbek kila theiding a, alangnih khuamakai te phalna bektawh ki sangding.
11. Khuami ahilo (2) val ala peuhmah, vekpi thukimna tawh kizui in RM 400 Zomi Cup fund dingin kiliau sak ding a, Zomi Cup sung tawntung kimawl sak nawnlo ding.
12. Khuadang pan midang alate’n mikhat RM50 ta Committee tungah piakkul ding hi.
13. Kimawl dingpa ZAM card hoihtak sitphatna ki nei ding.
14. Zomi Nam Ni pahtawina a ii vaihawm ahih mah bangin Zomi Nam Ni bawlkhopna ding sum kidong pen a khialo Khua peuhmah Zomi Cup lutsak loh ding.
15. Zomi Cup thu le la tuamtuam tawh kisai in Media/thu kizakna ding a kiseh te lo buangin thu le la suah sak leh khah khiat theihna ding phalna omlo hi.
16. A kisehsa kimawl ding hun aa pailo, kimawllo Khua/Team peuh mah Zomi Cup fund dingin RM 400 kiliau sakding.
17. Khua/Team lut ding peuh mahin Deposit sum RM400 committee tungah ap hamtang ding aa, Zomi Nam Ni ciang kipia kik ding hi.
18. Deihloh pen kimawlna sungah a kilawmlo luate Yellow Card ngah khat RM 30, Red Card ngah khat RM 60 Committee tungah kipia sak ding, Red Card ngah pen puai khat kikhawl sak ding hi.
19. Kimawl ding peuhmah in ball boot lo tawh kimawlna sungah lut theilo.
20. Group stage pan akah ding Mark kikim a om leh Mark tawh khentat dingin ki thukim hi.
21. Group, knockout leh quarter kisuihsung Half-time Minute 10 ki tawlnga ding a, Semi leh Final Minute 15 ki tawlnga ding hi.
22. Knockout ah akidin aomleh Penalty 5-3-1 ki sui sak ding a, 1 pen Goal Keeper hiding a, akidit lai leh mee sawk dingin ki khentat hi.
23. Final leh semi-final ah a kidit leh hunval Minute 20 kisui sak ding a, a kidit lai a hih leh penalty 5-3-1 leh mee tawh mah khentat ding.
24. Group teng khempeuh kimawl hunding Minute 50 hi ding a, Quarter pan in Minute 40 leh Semi-final leh Final ah Minute 45 ki suiding hi.
25. Kimawl kipat pan kipan a zawh dong Referee kawm dingin ki thukim hi.
26. Team/Khua (1) lutman dingin RM800 ki thukim hi. (A zenzen in a kicin kei a leh Deposit sung pan behlap ding).
27. Kimawl hun ni teng khempeuh zingsang nai 8am in kipan ding hi.
28. Deih loh penin kimawl hun laplo Team/Khua khat peuhpeuh a om a ahih leh mi 7 a cin leh kisui sak ding a, a cing kei a leh mins 15 kingak ding a, tua hong lap kei lai leh 3:0 in ki ciamteh ding hi.
29. Kimawl kipatma mins 30 sap in kimawl dingten list ap hamtang ding a, tua sung mah in kimawl dingte sit cianna kinei lai ding.
30. Kimawl ding a kilaih ding ciangin Committee te tungah ami tawh maikaite in paipih ding a tua panin Committee te khat in Referee thu neite tungah kigen sak ding hi.
31. Uniform pen deih bangbang kilei thei in ahih hang color kibang kimawl khawm ding a om leh mee sawk in silhthuah kinei sak ding.
32. Zomi Cup hunsung kimawl ding khempeuh zukham a om leh kimawl saklo ding.
33. Zomi Cup hunsung kimawl hun sung teng Committee phalna loh vanzuak (guih theih kham theih) zuak a om a ahih leh Committee in RM 1000/ kiliau sak ding a, bek thamlo in Thupuak (news) ah zong kisuah ding hi. A kisap leh zong thu neite tung ki ap ding hi.
34. Zomi Cup sung khutlum ngakha a om leh tua Team RM 400 ki liau sak ding a, a Team bup kisui sak nawnlo ding.
35. Zomi Cup sung thu le la telcianlopi a Committee mawh sak nuam a om leh RM 400 kiliau sak ding a tua Team kikhawl sak ding hi.

Zomi Cup vai khatpeuhpeuh kizoptheihna ding:
Hau Suan Khai 012 367 4665
Mangpu 019 510 6413
Kam Mung 016 995 6231
 
UN minsanna vai zaksakna :: ZAM Card tawi Zomi te UN minsanna pen 30% khawngbek manpan hi ci’n UN Officer te’n hong zasak uhhi. Acianlai tepen aki piakkik hunding hong gencianthei nailo uh a, ahi zongin tukhabeikuan lamah hikhading ci uhhi. Tua ahih manin March 06 masiah ZAM Card ahing atawilai te adingin lamet abei cihbang hilo a, lungkham luatding hilo hi. UN Officer te’n ani ding hong zaksakkik dinguh aki ngak gige hi a, hong zaksakphet un Thupuak leh Online tungtawn in amanlang thei penpen in hongki tangko khiapah dinghi.
 
ZAM card tawite’ ading Nasep!
(1). MEGAWORTH RESOURCES SDN BHD, Kajang Setzung ah, Zomi pasal mi 3 kideih , Nasep hun nai 10 sung, Nipi ni sim Off, Omna pia, An pialo. Kha sum RM1000/-.
(2). Kajang Ansai ah, nasem ding mi 5 kideih, Nasep hun nai 11 sung, Kal khat ni 1 Off, Omna leh An pia. Kha sum RM1000/-.
(3). Pudu Ansai ah, nasem ding Zomi numei 2 kideih, Nasep hun nai 11 sung, Kal nih ni 1 Off, Omna leh An pia, Kha sum RM1000/-.
(4). Cheras Ansai ah, nasem ding Pasal mi 10 kideih, Nasep hun nai 10 sung, Nipi ni sim Off, Omna leh An pia. Kha sum RM1000/-.
(5). Cheras Yulek Restaurant ah nasem ding Zomi pasal mi 5 kideih, Nasep hun nai 12 sung, Kal khat ni 1 Off, Omna leh An pia. Kha sum RM1200/-.
Kizopna ding: David Mungno ph: 017 333 4320.
 
Palai Prayer Meeting :: ZAM Palai te’n khakhat in khatvei Malaysia gamsung aom Pawlpikem Pastor te ki samden a, thu ngetkhopna ki neiden hi. November kha Palai Prayer Meeting zong November 08 ni in Shalom Christian Fellowship pawlpikem Pastor Kham Lian Tuang in hong makaih in tha ki ngahmahmah hi.
 
Kimat kihen omdenlai hi :: Kimat kihen pen munkhempeuh phialah nisimmah in omden hi. UN minsanna piak akipat khitzawh miman te hatsemsem zawlai uhhi. Tua ahih manin vaksuk vaktohna ah kidawmpha mahmah ni. Bus tungpan mat atuakzong tampi in omkhin hi. Kotaraya kuamsung leh Pudu kuamsung panin akiman nisimphial in omden hi. ZAM Card tawite kimat kihen natuah leh hih Phone na hopih un: 016-254 4093, 016 646 5375

ZAM Hall ki kawmthei :: ZAM Hall pen Session khat (nai 4 sung) RM200 ki lading a, nai 4 khitciang azatbehtoh nopleh naikhat RM50 ki lading hi. Aki zangthei vanteng: Aircon, Tutphah 150, Drum Set 1, Sound System, Wired Mic 1, Wireless Mic 2, Usher Counter leh adang tuamtuam. Alunglut te’n hih Phone 010-823 0571 ah naki zom un. Note: Guihtheih khamtheih zat ki phallo hi.
 
ZAM ah Ngeina Puan ki leithei ta :: ZAM zumpi ah ih ngeina Zopuan te ki leitheita hi. Aki ngahthei van te: Zopuan (pasal), Zopuan (numei), Puandum, Zodial, Zodial naikhau (silk), Puanlaisan, Tanghciin, Khephiau Dotbehnop aomleh Siama Ngaih Hau 010-823 0571
 
ZAM Card (atuh = Imitate, Fake) :: ZAM zumpan a kibawllo, mundangpan aki bawltawm ZAM Card tawh UN minsanna honglutsawm te UN Officer te tungah hongki Report pahding hi. Khasia keini, ih gamtat kidawm ni.
 
Zolia & Zotaang DVD leh Calendar :: Tukum Khuado Pawi hunsung ah atuamdiak in ihbawl ahi Zolia & Zotaang kidemna DVD pen maikal sungin ki hawmkhia tading hi. Zolia & Zotaang te pahtawina in akibawl ahi 2014 Calendar zong hongki hawmkhiading ahih manin akua mapeuh in tha piaciat ni. DVD leh Calendar tepen khatciang in RM10 tatawh tha kipiathei hi. Nangkiang ah hongki zuakkhak leh Zolia & Zotaang te pahtawina in naleisak hamtang unmaw.
 
Lungdam Kohna :: Malaysia gamsung ah kalsim in ZAM Thupuak Copy 2000 bang ki Print khiaden a, amawkna in ki hawmden hi. Tuabang in ih Print zawh nading in a lunghimawh Pawlpi leh Mimal pawlkhat in panpihna hong piakhia zelzel uh ahih manin ki lungdam mahmah hi.

1) USA aom Sia Mangpu (Tungzang) in Thupuak bawlnading in RM50 hong piakhia hi.
2) Philip Mawng (Taungzalat Restaurant) in Thupuak inzong Thupuak bawlnading in RM200 hong piakhia hi.
3) Zomi Catholic Community in Malaysia - ZCCM (St. Joseph Biakinn, Sentul) panzong tukum 2013 kumbeidong kalsim in RM50 ta hong panpihding cih ZCCM Pawlpi makai te’n hong zasak uh a, tukal Thupuak bawlnading zong RM50 hong piakhiapah uhhi. ZCCM thu akicing in a theinuamte in Francis Khampi: 016-2691351 or zomicatholic.community@gmail.com ah kidongthei hi.
 
Taungzalat Restaurant pan zaksakna :: Taungzalat Ann sai ah zukham khitciang in aki tomtomthei pawlkhat om ahih manin midang te leh agei aom Annsai dangte nawngkaisak mahmah hi. Tuabang in zukhamsa in aki tomtom leh miphinphin nuamte Security te kiangah ki apding ahih manin, akhasianuam ih omleh gamtat kidawm ni cih kong zasakkhol uhhi. Taungzalat Annsai
 
 
Address:
155A Jalan Maharalela,
50150 Kuala Lumpur
Office Tel: 03-2142 6659
Hotline: 016-293 9027
Email:  zomiassociationmls@gmail.com
Malaysia gamsung aom ZAM (Zomi Association of Malaysia) panin Zolai tawh kalsim in Newsletter neiden uhhi. Kuala Lumpur khuapi sung aom Zomi te kikhopna Biakinn Churches tuamtuam leh Zomi te paidiakna ansai Restaurants tuamtuam ah Printed Copy kikoih kawikawi hi. Ahi zongin Kuala Lumpur khuapi tawh aki gamla aom khuate ah ahunlap in ki ngahlo ahih manin, tuate ading khualna leh Internet azang leitung muntuamtuam gamtuamtuam aom Zomi te ading khualna tawh ZomiDaily website tungpan kongsuaksak zelzel uhhi.