ZAM Thupuak::15 December 2013

• ZAM Thupuak :: 15 December 2013
  

  ZAM :: Zomi Association of Malaysia
  
  UNHCR-CDU tawh Kumcin Picnic
  
  Kum sim a kinei den ahi UNHCR-CDU in November 12 ni-in amau nuai a om kipawlna om te lakpan kumcin Report hoih tak apia, mai kum ading geelna Year Planning a ap ki pawlna te leh a picingsa kipawlna pawlte Port Dickson tuipi ngei ah hong paipih uh a, tua sung ah ZAM zong kihel thei hi. Kipawlna 39 kihel ding lak panin 26 kihel thei in UNHCR-CDU pan ulian mi 4 in hong paipih uh hi. Sun sung teng a Group in kikhenin kimawlna tuamtuam hong kimawl pih uh a, nitak lam ciangin tuipi tungah gunkuang hot hong kidem sak uh hi. Sapna sung a kihel a picingsa kipawlna te a kua mapeuh in nuam kisa thei mahmah hi.
  
  UN minsanna vai zaksakna
  ZAM Card tawi Zomi te UN minsanna zoptohding pen ahun hongnai mahmahta hi. Ahi zongin aniding pen akician sitset in UN Officer te’n hong piathei nailo uh ahih manin mipi tungah hongki zasak ngam nailobek ahihi. Nungin akipiakna mun ahi FGA biakinn pen ki ngahzo nawnlo ahih manin UNHCR-CDU te hongsawlna tawh kizui in biakinn tuamtuam zong aki dopsak kawikawi ahihi. Tua hi a tutadih in aniding mipi tungah ongki zasak theilian nailo ahihi. Ahi zongin na tangthu ding aki gingsa in na omdetding thupi hi. Aniding aki theihphet in Internet tungtawn ahi zongin, ZAM Thupuak tungtawn ahi zongin hongki zasakpah dinghi. Hihvai ah bangmah nawngkaina aomloh nading in thungetna ah phawkciat ni.
  
  
  
  Theihding: Kipawlna akician mahmah khatah Card bawlkhin peuhleng adang bawlthuahthuah kullo ahih manin ZAM Card natawileh phazo hi. Akician kipawlna hipeuhleh hongvanzo veveding hi.
  
  
  
  Kolbulh khaukhih
  
  Kolbulh khaukhih cihpen ih tuaknop het lo thukhat himah taleh ih pelh theih loh hun hong om zelzel ta mawk hi. Gitnat lohman leh vaak hatna hangin a kituak zong hi khin lo a, innsunga ommuangte naleng zong kikaikhia in thawngsung denna atuak zong tampi tak Zomite lakah ki om hi. Hibang ih tuah hun ciangin ZAM memberte'n ZAM palaite nong zaaksak uh pen ahiding mah hi. Ahizongin khat na zaaksak khit naak uleh kolam pan akul bangin na kizasak sawn ding hi ungh. Nong zaaksak ngeingai uciangin thulela kipelh liapluap thei hi. Palai lampanin hong buaipih pah theih kei zenzen lezong heh pah ding hi lo hi. Nomaiah akiman om khin cihna hipah dinga, ahi zongin a hunlap in hong kibuaipih hamtang ding hi. Khatveivei hibang hun ciangin athuakte lampanin lunghimawh luatna tawh khuapih khuazaang kiko a, tua tengin tatsat lo in palai teng kamkhum awnem leh kamkha tawh hong hopih mawk uh hi. Hite pawl pen sum tawh tat theih ahileh khuabup in kibuaipih thei a, ahizongin thuneite tawh kizopna ah hih khop ngeingai man a alem thei pah ding cihna zong hipah tuan lo ahihman in a buaipihte lung-ap theihna dingin hophih huan ngeingai kei zaw lehang lungnop huai ding hi. A kibuaipih ding eiteng mah hihang a, a kithapia ding zong eiteng mah ih hihi.
  
  ZEC - Talalla & Maharajalela pan zaksakna
  2014 Laisim kum adingin sang apna (registration) a nuai a bangin kinei kik ding a, sanglutna mi khat ciang RM30 hi ding hi. Boader ah naupang 55 ciang bek kisang zoding ahih manin boarder om a sangkah ding peuhmah in a hunlap a sang nong ki-ap na dingun ong thei sak ung. Ani 17-20 December 2013, Amun: ZAM zumnuai.
  
  
  
  Zomi te Thong pan hong tuak:
  Hunkhat lai aa ZAM palai te in akibuaipih mahmah Zomi kiman pawl khat te lak pan, nanas Camp, Johobahru pan in Zomi (50)kim zanni in UNHCR te in vatat khiatsak uh a, UN minsan na ngahsa in cidam takin Kuala Lumpur hong tung uh ahih manin ZAM zumpi pan in ki lungdam pih mahmah hi.
  
  
  
  ZSM zum ah nasem ding Zomi nungak khat kideih:
  ZSM zum a nasem dingin Zomi nungak khat kideih a nasep siau nuam te in ZSM/ZAM zumah interview kipai thei hi. Contact03-92261 926,016-9956 231
  
  
  
  ZSM palai ding min sazian kikai khawm:
  ZSM kumcin khawmpi leh kiteel ding hun hong naita ahih manin maikum ZSM palai dingin Khua kipawl na leh Pawlpi tuamtuam panin Zomi adingin muan huai nasak te min sazian kipuak thei hi. Contact: Dr. Pau017-3291 810, Pa Kam019-3385 142
  
  
  
  UN laidal pi tawi te kiman thei veve:
  UN ngah khin ngawn ing ci in UN laidal pi alen lai te pen Card hi nailo ahih manin kiman thei veve a hih manin laidal pi tawi te kidop huai mahmah hi.
  
  
  
  ZSM kumcin khawmpi leh kiteelding vai sapna
  Topa hong kalsuanpihna tawh 2013 kumbei dinghi ta a, tukum sungin Zogam pan Malaysia ah galtai ih sanggam te mihing (27) in Malaysia gamsung panin hanmual hong liamsan uh ahih manun amaute phawkna leh ih dahna ih pulak hi. Migam mi lei ah hong nusia ih sanggam te'n hanmual atan zawh na'ngin 2013 kum GENVAI (ZSM) kipawlna ah RM10 tawh ih kihel manin amau te in hanmual atangzo hi uh a, ei mimal leh ih innkuanpih te adingin thupha bawl leh nahoih sem ih hihi.
  
  Tua hi a 27/12/2013 Friday ni 11am hun in ZAM Hall ah ZSM kumcin khawmpi leh 2014 kum ZSM palai kiteelna neih dingin thukhensatna kinei hi.
  
  
  
  Baihlo Hi, Piangthei Hi
  (Too Difficult But Possible)
  A deuhdeuh in 2010 June kha masiah ZEC aa ma pang kha peuhmah pen, pahtawina pia ding bang hile'ng bangdanin pia ding ihiam cihzong ngaihsut hak liangding hi! Athei ki tamzaw in cin, ZEC kipat 2007 November pan 2010 June kum nih leh lang val pen a lamdang takin Ki Piakkhiatna Hunpi sung kici thei hi. Cialna-guaihna kipia zo kilkello hi! A patpan ki piakhia tawh, kum nih ki piakhia tawh zahtak-pahtawi huai thei mahmah hi. Pulak dingin a mi tamsim hikei leh, 2007 pan a kumkum aa ZEC Sang tuamtuam aa semteng ii Min teng kikem sitset aa, ke'n zong file khempeuh copy kemlai hi'ng; Tangthu ding hi!
  
  2010 June kha aa kipan compensation/incentive cih min vawhin UNHCR in 2009 aa Sang Sia kipan khinte khasum dan hong vaihawm sak tasam uhhi. Tua 2010 aa ZEC Sang Sia hong kipan tampi tak mahin ngahthei tuan nailo zel bek thamlo, a kumkik 2011 aa ngahthei nailo ki omto lai ahih manin, tua lai aa, a seppih alui tengin kha simin nektawm khop ngahta leh amau ngahlo pipi a sem tantan teng zong pahtawi huai kasa hi. (ZEC Sang 6 pan tuadan ka theih sitset Sia 9 bang om hi.)
  
  Zomi-Malaysia Tangthu ah, ZEC in, ih sep nailoh pi, ih vaihawm lohpi, sum ahih kei leh thamanh ombek teh, UNHCR te maimuh bekteh na kisem panlo hi, cih pen thu namtui mahmah anei gige ihihi. Tua hi-in, Zomi naupangte veina anei pen minam mailam ding a lunghimawh taktak khat hi; A vei ciang bek, athei ciang bek hilo aa, asem tangtangte minam vei hi; Sep tangtangna ding haksatna tampi kawmkal pan ahun khempeuh a piakhia ngam, a piakhia zote minam nasemte ahihi.
  
  Kum 3-4 sung asem masate'n zong nisimin van gik mahmah na pua tentan zo buang ahih leh, tulaitak aa semte leh mai kha, mai kum aa sem toto dingte-in, tha san aa, hun neih zahzah piak ngam lohna ding om kilkello hi. Ni khat aa ih sepnop zah hun cihkhat ih ciangtan mawk leh bel ih veina dan atuam hiding hi. Kei theihkhak ciangciang bang, UNHCR in Hun-bit Siate bek Sia/Sianu khat in ciamteh hi! Tua UNHCR ii ciapteh ding manin Hun-bit kisem pan hilo zaw leuleu, cih, ei ZEC aa sem peuhmah ki khentat zawhna neihding kisam den hi. Tua tawh kizui-in, hunbit sepding omkei aci ih omkhak leh ih naupangte aa ding leh ZEC maban ding khasiat huai mahmah ding hi. Ih muhna, ih sawmna/tupna zaisak semsem le'ng Malaysia ah palai nasep pen nisim in hun kicing khollo hi!
  
  Ei mimal haksatna tengtawh Zomi naupangte hunbit aa makaihna pen baih asa omlo ding hi. Ahi zongin, kei theihkhak ciang ih gualzawhnasa pawlkhat enkik pak le'ng; ZEC in hunbit-nibup lai leh theihna, pilna kician hilhna neizo tawntung hi. ZEC in, UNHCR/HTC ah Siate training paisak den hi. ZEC in, UPSR laihuannate kilut, ki gualzo zo hi. ZEC in, minam puan leh ngeina laam tawh namdangte mai-ah teelna kingah den hi. ZEC in, Computer lamah Best Center pahtawina kingahzo hi. ZEC in, 2008 pan 2012 kikal kimawlna lamah namdangte sang' a tamzaw Gualzawhna Cup tuamtuam 20 val kingahzo hi. ZEC in, Faisal Cup a vaihawm lak aa kihel ding community lam panin committee mi 2/3 lakah 2009 pan 2012 kikal panmun kingah den hi. ZEC in, 2010-2012 kikal Malaysia aa om galtai Sang, Sang Siapi khempeuh ii Tangmi (representative) dingin teelna kingah den hi. Tua sung mahin, namdangte Sang Siapite na lengin UNHCR tawh kizopna pawlkhatah ZEC ii panpihna hong ngenden uhhi. ZEC Sangte a kigawm Sports Day ki vaihawm khawm zo hi. UNHCR makaihna tawh Teachers Day nopci takin nihvei kibawl aa, a pawi vaihawmna-ah committee panmun tawh ZEC in thatang leh hun tampi bei-in ma kipang thei hi. UNHCR in, UN phualpi Geneva pan ahi phial zongin, Malaysia aa Galtai Sang tawh kisai a en ding, a kanding hong pai simin ZEC hong hawhsak den hi; Education vai Media tawh kimuh ding simin ZEC hong ap uhhi. Malaysia aa galtai Sangte tawh kisai vaihawm thak ding thu khat a omsim in ZEC hong kum masa den uhhi. A thupi penpenah, ZEC in mindang neilo Zomi min tawisang den hi!
  
  Sepkhopna tawh gualzawhna tampi kimu aa, hunbit Sang Sia sep pen, haksa mahmah ta leh piangthei mahmah hi. Too Difficult, But Possible!
  
  Vekpi tung lungdam! @Tg. Kham @ Khampi
  
  
  
  ZAM Card tawi Zomi te ading nasep om
  (1). Anbuk sung sem ding Zomi pasal 2 kideih, nasep hun nai (11) sung, Kal khat ni 1 off ding, Omna leh an pia, Kha sum RM1400/-, Mikangpau (English) pau siam ding, maitai ding, amun Subang Jaya sung hiding.
  (2). Inn sung nasem ding Zomi numei 2 kideih, Kal khat ni 1 off, Kha sum RM1200/-, Omna leh an pia. (Theih ding: Puteek, Piteek kem ding cihna hi.) Kizopna ding: Sia David Mungno – 017-333 4320.
  
  
  
  Hih munteng ah nisim kimat omden hi
  Tusungteng nisim in palik suansilhlo te’n mi manden uhhi. Adiakdiak in mi aki limmat diakna munte pen KL Kotaraya, KL Mydin, KL Parsa Seni, Pudu LRT Station, Pudu Plaza, Maluri LRT Station, TBS Bus Stand te ah nisim in mi kiman den hi. UN Card nanei zongin hongki manthei veve ahih manin kidop mahmahding thupi hi. Palik te omtheih diakna munte zong ihtheihsa, ih zakzaksa ahih manin nawkkhak hetlohding thupi hi. ZAM Card tawite kimat kihen natuahleh: 016-254 4093 & 016-646 5375 te na hopihpah un!
  
  
  
  Zolia & Zotaang Calender :: Zolia & Zotaang te pahtawina in akibawl ahi 2014 Calendar asawtlo in hongki hawmkhia ding ahih manin akua mapeuh in tha piaciat ni. Nangkiang ah hongki zuakkhak leh Zolia & Zotaang te pahtawina in naleisak hamtang unmaw. Zolia & Zotaang DVD zong aki hawmkhiakhin hi a, adeih te’n Zolia & Zotaang te kiangmah ah ki ngahthei laiding hi.
  
  Lungdam Kohna
  Zomi Catholic (ZCCM, St. Joseph Church, Sentul) pan tukal Thupuak bawlnading RM50 hong piakhia uh ahih manin lungdam ihko hi. ZCCM Pawlpi tawh naki zopnopleh: Francis Khampi 016 269 1351
  
  
  
  ZAM Hall ki kawmthei :: ZAM Hall pen Session khat (nai 4 sung) RM200 ki lading a, nai 4 khitciang azatbehtoh nopleh naikhat RM50 ki lading hi. Aki zangthei vanteng: Aircon, Tutphah 150, Sound System, Drum Set 1, Wired Mic 1, Wireless Mic 2, Usher Counter leh adang tuamtuam. Alunglut te’n hih Phone 010-823 0571 ah naki zom un. Note: Guihtheih khamtheih zat ki phallo hi.
  
  
  
  ZAM Palai sungpan kua tawh kizomding
  
  Kimat kihen natuahkhakleh:
  Sia Tuangpu : 016-254 4093
  Sia Thaa Mung : 016-646 5375
  Sia Kam Mung : 016-995 6231
  
  Zato vai kisapna aomleh:
  Sia Khoi Tuang : 010-286 6189
  Sia Kam Sang : 016-918 9692
  Sia Kep Lian : 014-369 4897
  
  Nasep leh Bank Card vai:
  Sia David Mungno : 017-333 4320
  
  ZAM Card vai:
  Sia Francis Lamthang : 014-225 9458
  
  
  
  Address:
  
  155A Jalan Maharalela,
  50150 Kuala Lumpur
  Office Tel: 03-2142 6659
  Hotline: 016-293 9027
  Email: zomiassociationmls@gmail.com
  
  
  
  Malaysia gamsung aom ZAM (Zomi Association of Malaysia) panin Zolai tawh kalsim in Newsletter neiden uhhi. Kuala Lumpur khuapi sung aom Zomi te kikhopna Biakinn Churches tuamtuam leh Zomi te paidiakna ansai Restaurants tuamtuam ah Printed Copy kikoih kawikawi hi. Ahi zongin Kuala Lumpur khuapi tawh aki gamla aom khuate ah ahunlap in ki ngahlo ahih manin, tuate ading khualna leh Internet azang leitung muntuamtuam gamtuamtuam aom Zomi te ading khualna tawh ZomiDaily website tungpan kongsuaksak zelzel uhhi.