Ka Birthday(Kum 27 cin)

A masa in tu ciang  ciang cidamna hongpia in hong kem ka biak Topa tung ah lungdam ka ko masa hi. A nih na ah ka pian mapek pan in kei a ding tawh hong buai pih mah mah in kasuah khit ciang leh tu dong hong  cing hong kem ka nu leh ka pa zong lungdam ka ko hi. Hong ci dam pih lai ka nu leh ka pa zong Topa’n khansau na thupha hong piaksak lai ta hen.

1986 kum kha 6 kha  pawl in ka nu  a biang meima in Tedim zato pi ah kipuak hi. Tua hun lai tak in kei pen ka nu in hong paai lai tak zong a hihi. Ka nu a biangmeima pen tawl pi khop khat a na a thuak khit ciang  kei lah ka suah hun tung dekta cih na tawh siavuan te in ki at mai in cih na tawh  a biangmeima pen na ki at a, tawl khat sung an ne thei lo hi. An ha lim lim nei thei lo a, buh tui peuh, cikhum tui peuh tawh haksa pipi in kei hongpaai a hihi. Ka nu in a biangmeima kawm kal ah haksa pi tak in 22 October 1986 (Wednesday) zingsang nai 10:22am in Tedim zatopi ah kei hong suak khia hi. Hih ni in ka suah ni ka Birthday hi a, ka nu a mai tai ni a hihi. Ka nu pen ka pa tawh a ki teen zawh kum 12 khit ciang in kei a piang pan hi mawk  ka hih man in ka nu pen naunei zo nawn lo ding ki sa a, tua kawm kalpan in kei hong neih pen nak pi tak in alungdam hi.Ka pa zong a lungdam sem lai hi.

Kumsim kumsim in ka suahni pen ka nu leh ka pa in hong bawl pih den uh a,a beisa kum te sung ah zong tamvei pi ka bawl khin uhhi. Gamdang ka tun khit ciang in zong ka nu leh ka pa in kei a ding in ka birthday inn ah hong na bawl sak den uh hi ci in ka za hi. Ka pa in nungkum a ka Birthday a ki bawl in maikum ciang Tu nei ta ding ka hih teh cih na tawh  birthday bawl dingki beh lap nung ci in upna tawh na pulak ngei hi. A cih mah bang in tu kum sung in Topa’n tapa khat hong pia a, nak pi tak in ka lungdam hi. Kei hanciam theih thu hi lo a, Topa hong piak letsong tak tak hi cih ka tel hi. Mihing te nuntak na pen ei leh ei in ih bawl tawm thei kei a, Topa hong piak bangbang a ki nungta, a ki pianga hih zawk lam ka telsemsem hi.

Ka sangsia ngei khem peuh zong hih lai mun paninzahtak na kong pia hi.Mailam hun ah zong hilh ding ka kisap te hong hilhlai un. Ka lawm leh ka gual khem peuh zong hih mun pan in na khut uh hong len ing. Ka suah ni in Facebook pan a hi zong, SMS pan a hi zong in Happy Birthday ci in hong lungdam pih khem peuh tung ah nakpi tak in ka lungdam hi. Ka nasep pih ka lawm teng in Birthday Cake hong lei sak in hong bawl pih a hih man un zong nak pi in kalungdam  hi. Ka theihkhak loh thu khat peuh peuh leh ka kisap na khat peuh peuh ah hong pan pih ka theih ngei loh te na ngawn hih mun pan in lungdam kong ko hi.

Tuni in

Kei hong piangsak ka Topa a minthang tawntung ta hen.

Gam kum pi te ki lem in, gamkhem peuhin daihna leh ki lemna, nop na a ngah ni hi ta hen.

Khual zin  gam vak te, tui tung leh vantung, lei tung a pai te khem peuh  tuahsia cih omkei hen la a  mavang ni uh hita hen.

Gan hing khem peuh zong a ci uh damhen la, leitung a etlawm sak ni uh hi ta hen.

Singkung lopa khem peuh in leitung etlawm sak uh hen la, nuam in nosuak ta uh hen.

Cina leh dam lo khem peuh in a dam ni uh hi hen la, zato ah mi cina om kei ta hen.

Hih leitung in cidam hen la, leitung ah a om na khem peuh in nopna a ngah ni hi ta hen.

Mikhem peuh lungdam ni hi hen la, mi khem peuh cidam in lungnuam ta hen.

Haksat na khem peuh a beini hi hen la, Haksat na ih cih pen tangthu bek inkigen ta hen.

Vantung a aksi leh khapi in leitung mi te a ding in khuavak hi hen la, leitung ah khuavak in khuamu lo mittaw te na ngawn in khua mu ta uh hen.

Sum leh paai nei lo te sum leh paai neih ni hi hen la, zawngna khem peuh a bei ni hi ta hen.

Thongkia mi khem peuh a suahtak ni hi hen la, thung sung ah kua mah thungkia a om loh ni hita hen.

Ka nu leh ka pa a ci uh dam hen la, akhan uh sau ta hen.

Kei bangtapa hong neih khak uh ka biak Topa leh ka nu leh ka pa a  lungdam ni uh hi hen la, kei hang in mai tai uh  hen.