Ahun lapsawm ni :: ZAM Card tawi Zomi te 22 October 2013 ni akipan Kuala Lumpur khuasung FGA Biakinn ah UN minsanna kipia taktakta hi. UN te'n asap hun uhpen zingsang 6:30 am hi a, ahi zongin zingsang 4:00 am pawlin mipi dimzihziah khin a, Gate maiah kigual dimdem khin in, a ZAM Card tawi leh ami kibangmaw kibanglo cihte Checking kilutpah ziahziah hi. Zingsang 6:30 am hunlian in Gate kihonglian a, mipi te kilutsakpah in, 7:00 am hunlian in Gate kongpi kikhakcip pahhi. Tua alap zolo te ki lutsak nawnlo ahih manin asuplawh hipah hi. Hun manpha mahmah hi, ahun lapsawm ni.
Appointment Date :: UN minsanna piak hunte nuamtak in ki zomto thei a, 11:30 am pawlin avekpi in ki mansiang theihi. Tuni alutthei te Tau (Wristband) kibulhsak a, atungah Appointment Date kigelh pahpah hi. Na Appointment Date nizong zingsang 6:30 am lapding ahihi. Tua Tau (Wristband) pen hoihtak kepding leh suahkhiatkhak hetlohding ahihi. Na lakkhiat khakleh alutkik theinawnloding hipah hi.
Guihtheih khamtheih kideilhlo :: UN minsanna piaknading in FGA biakinn sung akizang ahih manin omdan, khawldan theihsiamding kisam mahmah hi. Za teploding, Zu namloding, Khaini, Sahdah muamloding, Dainawl khawngah zun phengthak loding cihnengneng te kigengenzong maizumhuai mahmah hi. Thupuak ahzong tamveipi hongki genkhinzo himah taleh tunizong mipi lakah zatep pawlkhat omveve a, Officer te hehmahmah uhhi. Officer tezong gammite vive hizaw a, Muslim te'n zu nelo uh ahih manin Zu
khamsa, Zu namsa in nalut leh hongki hawlkhiakik dinghi. Tuni zong Zukhamsa in alut pawlkhat aki lehhawlkhiakik ompah hi.
khamsa, Zu namsa in nalut leh hongki hawlkhiakik dinghi. Tuni zong Zukhamsa in alut pawlkhat aki lehhawlkhiakik ompah hi.
Unau lutpih te :: Sanggam kum 18 nuai tebek kumcinglo in ki lutpih theihi. UN Officer te mihai hisamlo uh a, akum cingpipi kumcinglo cih khemding hilo hi. Kumcinglo in akhemte anih in ki ciahsak ziauziau a, UN alut theinawn loding hipah hi. Unau nahih uhleh nanu napa minkhawng uh akibat kulsam hi. Kumbangzah kihal nahi uhhiam hongkicihleh nadawntheihpah setsetding uhzong thupi samhi. Atelthei pahding in lamen hang.
Na Card ahinglai hiam? :: Na ZAM Card zong ahing (Valid) ahihding thupi hi. Tunizong ZAM Card asikhin atawite aki ciahsakkik tammahmah hi. Tuakhitciang tulaitak akipia tepen ZAM Card tawi Zomi tebek ahih manin namdang leh Card dang atawite ki lutsaklo pahhi.
Lungduai leh thuman kisinni :: Nikhat mi 1000 leh 1500 kiimtabang alutden ahih manin ih mipi te uk hamsa mahmah a, tawmveisung bekbek ahi zongin makaite hongcihcih nathumang teta phot un. Hihteng ah kigualding acihleh nakigualpah un. Khua makai te leh Pawlpi makai te'nzong honghuhthei uh ahih manin ki lungdam mahmah hi. Kampau, mukpau kakhialh uhlehzong hongna telsiam photmai un, hongkinot ziahziah khading hi.
ZAM ah na sittel hiam? :: UN pan hongkisap hangin ZAM zumah nanu napa min hongkancian theilecin hoihzawding hi ci'n Thupuak ah ihsuahsakdet hi a, pawlkhat hongkanlo te buaina ompah hi. Anu apa min bangcipiak, aminpi maw, minneu citawh acimawh honkhat ompah hi.
Hongki sapnibek napai un :: Ani akisamlo pipi inzong napaileh hongki ciahsakkik dinghi. Tuaban ah lamkal ah kimat kihen natuahleh hongki buaipihman loding hi. Palai te UN minsanna ah zingsang 4 am pan kipan in kibuaitek ahih manin akisamlo pipi a hongpai te akimat leh ki buaipihman tadihdih loding hi. Tua ahih manin nang hongkisap keileh napai keizaw in.
Officer tetawh naki muhkhitciang Tau (Wristband) na ngahkhitleh naciahsuak pahpah un. Bus Stand, Taxi Stand khawngah nadingding deldel kei un. Palik te adingin tulaitak sumzonzia abaih mahmah laitak hi a, ahunhun in Motorcycle tawh hong kimvialden uhhi. FGA biakinn maiteng ah nakilehsuk lehtohleh Palik te'n sumtawkna in hongneiding hi. Na khutah Tau (Wristband) aom zenzen hangin liausum pialo in hong khahkik loding uhhi.
Palik te hatmahmah :: Tusungpen Kuala Lumpur sungah UN Registration kipia cihpen Palik te'nzong natellua mahmah uhhi. Tua ahih manin koikiu pan manding, sumngending cih hong ensimsim omden cih thei in. Meileng Station, Bus Station te ah miman te cidinghiam sumzongte cizawding hiam omden uhhi. Highway Bus Station te ahzong tuni akiman honkhat omhi. Lam napaiciang napai nading enkhol in. ZAM iNFO
0 Tongkum :
Post a Comment