Kei leh Aw Ba

Nang leh kei pen khuasung khat ah a om khawm ih hih hang in nang kong thei kei a, nang zong kei nong thei kei ding hi. Nang kong theih cil na ni pen sangsia te in pawi hong bawl pih uh a, laivuan na ah a khatna ngah in letsong na sang hi. Banghang hiam cih leh ke’n zong letsong ka ngah a, letsong ngah teng kua teng hiam ci in ka kan kik teh nang hong thei pan ka hihi. Nang pen lai a pil khat na hi a, a et teh taak khat na hihi. Khua ah nang kong theih zawh a sawt lo in nang pen Tedim ah na innkuan un na ki tuah uh a, Tedim ah na omuh hi.

Tedim ah Tan 7 kum sangkong kah a, tua lai ah ih ki thuah hi. A hi zong in nang leh kei pen ih tan ki kim lo a, sangpai khawm cih dan ciang bek ih hihi. Tan 8 kum khua ah ka kah kik a, tua kum ih ki tammuh nawn kei hi. Ka tan 9 kum ciang zong nang tan 10 na hi ta a, lai sim ding tamlua in ih ki tamthuah man kei hi.


2002 kum July kha bei pawl hi ding hi. Nang pen tan 10 a kum khatna na kia a, a kum nih na a kah ding na hihi. Mizo gam ah sum tha lawh in na va pai a, tan 10 a zomkik ding in hong ciah suk kik na hihi. Sangpi ah sangzom kik ding ci in na na pai a, kei sang in ni khat in sangpi ah na lut masa zaw hi. A zingciang in kei zong sang pi ah kong lut a, tan 10 room B a nunggual penpen ah ih tu khawm hi. Ih sangkah pih te pen sang a kahzawh uh kha 2 sung a pha ta a hihi. Sangpi ah kong lut cil ni pen Tuesday ni hi a, Wednesday ni in laivuan masa a ki vuan ding ahihi. Ih sangsia pa in ei te gel kiang ah no te gel zingciang laivuan ding na thei uh hia? Na vuan kei uh leh ka khaan pan in hong hawl khia ning hong ci lai hi. Phawk lai ding in kong um hi. Tua ni pen sang ka kah cil ni a hih man in laibu ka pua kei lai lai hi. Nang zong laibu na pua kei a, laibu nei lo pi in nitak sangtuah dong sangkhaan sung ah ih om pong hi. Nitak sangtuah ciang ih min leh ih tutna ding nambat sangsia te in lai tawh hong suang khia uh a, ih khaan sung ah mi ma 90 val bang sung ah pasal 38 a om lak pan nang pen na tutna ding nambat 37 hi a, kei tutna ding nambat pen 38 ahihi. Nangkiang ah zingciang lai ki vuan ding ci leng bang teng hi ding hiam? hong hilh in kong ci a, nang zong bang mah na thei kei hi. Banghang hiam cih leh laibu ih pua kei hi.

A zingciang in subject 6 a vek in nikhat thu a, a ki vuan ding hi a, laivuan na khaan sung ah lut in lai ihvuan hi. Nang leh kei pen ih tutna ki nai a, ih lawm te bang in mithak ih hih tawh heh pih huai hongsa sim sim uh a, a mau theih sun sun bang hong hilh nuam uh hi. Ni khat thu in subject 6 ih vuan khin a, bangteng hiam zong ih thei kha man kei phial hi. Laivuan khit zawh a zingteh sang ih kah a, Bio siapa in tutna nambat 37, 38 leh Thang Sian Mung a mai ah hong pai khia hong ci a, ih va pai hi. Ih khialhna bang om hiam ci in ihdah mah mah a, a hi zong in ei teng 3 in mat 25 lak pan in 24 tuak ngah ih hih man in ih Bio siapa in lamet na om hongsa pian in hongsam khia na hi hi. Mi khem peuh in lamdang hongsa uh a, hong kih tasim pian pah uh hi. Nidang in sangsia te in Valvum te mihai hon hong ci in hong ko ko uh pen ei tan 10 kumin kua mah in Valvum te mi hai hon hong ci ngam nawn lo uh hi.

Banglo teng tawh tan 10 kum ih hun mawk beibei in laivuan hun hong tung hi. Lai ih vuan a, nuam tak in ih vuan thei hi. Tan 10 ongsazian hong ki theih teh nang zong na ong a, kei zong ka ong hi. Tan 10 ong khit teh kei pen khua ah ka om a, nang pen Tedim ah om in ih ki mu pakpak nawn kei hi.

Tan 10 ongkhit zawh takteh University zom suak pah lo in kumkhat tuak ih mawk khawl hi. Banghang hiam cih leh nang pen vanlenghawl na ut a, vanlenghawl tintan kah nuamin na ngah loh tak teh kum khat sung sangzom lo in na na mawk om hi. Kei zong sumhaksat na hang leh vai tuamtuam teng tawh ka zom pah thei kei a, kumkhat sung ka khawl hi.

2004 kum December kha ciang in Kalay University ah sang zom ding ci in ka pai suk a, nang zong tua kum in sang a zom ding na hih lam kawl ah ih ki thei pan hi. Sang form ih fillup na ding pen sum tawmkhat leh niangtui man piak ki sam a, ih buai mah mah hi. A taktakin sangsia te in niangtui man adeih uh pen bangmah pia nuam lo ih hih man in hong nawhvai hawm sak lo na hihi. Ni pi khat khit khawng teh sang ihkah thei a, nang Major khaan ah kei hong pai in kei khaan ah nang hong pai zel in cih bang teng tawh nuam sa in ih om hi. Hih hun te in ih hunnuam hun hi ding in ka um hi. Innkhat ah innsap khawm ih hih man in ih duh, ih deih, ih zia te pen ih ki tel mahmah hi. Sang man khit tak teh nang leh keipen ih ki mumeng meng nawn kei a, ih ki thu za kei hi.
2008 kum tak ciang Yangon pai suk in gamdang pai ding in ka vai hawm hi. Up mawh loh leh theihkholh loh pi in Yangon ah na na om a, lamdang bang ih ki sa liang hi. Nang tawh gamdang ih pai khawm a, kum 3 sung bang ih ki thuah leuleu in na ih sem khawm hi. Gamdang ih om na mun pan in nang pen gam 3 na mun khat a pai sawn ding na hi a, na ngim na na tup na te thu pi kong sa hi.

Na bawl khiat facebook group, Blogger, Website tawm san nawn lo a, midang a ding in na hih theih zah in na huh hi. A diakdiak in Valvum vontawi facebook group in muntuam gamtuam a om Valvum mi teng hong gawm tuah a hih man in lungdam hi. Facebook, Gtalk Party chat, Viber, Video edit, Photo edit,…thuthak tuam tuam, namtam pi tak tawh ki zop na nuamthei thei ding in na han ciam a, na gual zo hi. Khang no khat na hih hang in , na theih na, na pil na sensang hi. Thu khat peuh peuh ka theih nop a om ciang hong dong leng minute 1 sung in nong hilh ziauziau thei hi. Mailam hun ah zong na pilna, na theihna hong khangsemsem ding a, na pil na midang te a hawm sawn zo leh nuntak zon zawh na ding pil na hoih no no a nei zo ding in zong kong lam en hi.

Gam 3 na na pai ni ding ka thei a, a hi zong in ka innkuan sung dam loh na tuamtuam tawh kong ki muh pih man kei hi. Kong ki kuh pih man loh hang in hong it lo, hong ngai lo hi nong cih khak ding ka dah hi. Topa’n na omna khem peuh ah hong om pih hen la, na ci dam in nikhat ni ciang lungdam maitai tak in Topa’n hong ki mu khawm sak kik ta hen.

Ki lam en hetlo pi in tan 10 ih kah khawm a, ki lam en lo pi in University kah khawm leuleu in, ki lamen hetlo pi mah in gamdang ih pai khawm hi. Gam 3 na ah zong nikhat ni ciang ki mu lai ding hang a, ki thuah kha lai ding in ka ki lam en sawnsawn lai hi.

" Nangbang lawm hoih kong neih khak man in ka lungdam" ci in hih mun pan kammal khat kong gen hi. — with Aw Ba.


Deih Tung